परभणीत २० हजार ६५१ हेक्टरवर ऊस लागवड

परभणी  ः यंदा (२०१९-२०) परभणी जिल्ह्यात जानेवारी अखेरपर्यंत २० हजार ६५१ हेक्टरवर ऊस लागवड झाली आहे. लागवड सुरू असल्यामुळे ऊस लागवडीखालील क्षेत्र अंतरिम आहे, असे कृषी विभागाच्या सूत्रांनी सांगितले.

ऑक्टोबर महिन्यात झालेल्या पावसामुळे विहिरी, बोअर आदी सिंचन स्रोतांमधील पाणीपातळी गेल्या काही वर्षांच्या तुलनेत वाढलेली आहे. जायकवाडी, माजलगाव, येलदरी-सिद्धेश्वर या मोठ्या प्रकल्पांसह मासोळी, करपरा हे मध्यम प्रकल्प, गोदावरील नदीवरील ढालेगाव, मुद्दगल, डिग्रस आदी बंधाऱ्यामध्ये पुरेशा प्रमाणात उपयुक्त पाणीसाठा आहे. सिंचनासाठी मुबलक प्रमाणात पाणी असल्यामुळे जिल्ह्यातील अनेक तालुक्यांतील शेतकरी यंदा ऊस लागवडीकडे वळले आहेत.

विशेषतः जायकवाडी डाव्या कालव्याच्या लाभक्षेत्रातील पाथरी, मानवत, परभणी, पूर्णा तसेच माजलगाव कालव्याच्या लाभक्षेत्रातील गंगाखेड तालुक्यात ऊस लागवड क्षेत्रात वाढ झाली आहे. पूर्णा तालुक्यात जायकवाडी डावा कालवा तसेच सिद्धेश्वर कालवा या दोन्ही कालव्यांचे पाणी मिळते. त्यामुळे पूर्णा तालुक्यातील ऊस लागवड क्षेत्रात वाढ झाली आहे. त्यामुळे येत्या (२०२०-२१) गाळप हंगामात साखर कारखान्यांना गाळपासाठी ऊस कमी पडणार नाही.

गतवर्षी(२०१८-१९) दुष्काळी स्थितीमुळे सिंचनासाठी पाणी नसल्यामुळे ऊस लागवड क्षेत्रात मोठी घट झाली. त्यामुळे यंदाच्या हंगामात गाळपासाठी पुरेशा प्रमाणात ऊस नसल्यामुळे पाच पैकी तीन साखर कारखान्यांचे गाळप सुरू केले. अनेक तालुक्यांत ऊस लागवड सुरू आहे. त्यामुळे उसाचे अंतिम लागवड क्षेत्र अद्याप निश्चित करण्यात आलेले नाही.