आळसंद येथील पशुवैद्यकीय दवाखाना उद्‌घाटनाच्या प्रतिक्षेत 

आळसंद, जि. सांगली : आळसंद (ता. खानापूर) येथे जनावरांच्या उपचारासाठी जिल्हा पशुसंवर्धन योजनेअंतर्गत सुमारे ४१ लाख रुपये खर्चून पशुवैद्यकीय दवाखाना बांधण्यात आला आहे. बांधकाम पूर्ण होऊन दोन महिने झाले तरी या दवाखान्याचे उद्‌घाटन झालेले नाही. त्यामुळे या दवाखान्याचे उद्‌घाटन होऊन तो कधी सुरू होईल असा सवाल पशुपालक करीत आहेत. 

परिसरातील आळसंद, बलवडी (भा.), तांदळगाव, खंबाळे (भा.), कार्वे, वाझर, जाधवनगर, कमळापूरसह नऊ गावांतील अकरा हजार लहान मोठ्या जनावरांना या दवाखान्याचा फायदा होणार आहे. आमदार अनिल बाबर व माजी जिल्हा परिषद उपाध्यक्ष सुहास बाबर यांच्या विशेष प्रयत्नातून सुसज्ज इमारत उभी राहिली आहे. ताकारी आरफळ योजनेचे पाणी आले आहे. बागायत क्षेत्रात मोठ्या प्रमाणात वाढ झाली आहे.

जनावरांच्या संख्येतही वाढ झाली. शेतीला आधार म्हणून शेतकरी दुग्ध व्यवसायाकडे वळले आहेत. किंबहुना अनेक शेतकरी दुग्धोत्पादन व्यवसाय म्हणून करीत आहेत. जनावरांचे संगोपन करण्याकडे कल वाढला आहे. परिसरातील शेतकऱ्यांच्या जनावरांप्रमाणे शेळ्या - मेंढ्या कोंबड्यांना हा दवाखाना फायदेशीर ठरणार आहे. 

जिल्हा परिषदेच्या पशुसंवर्धन योजनेअंतर्गत बांधलेल्या दवाखान्याचा परिसरातील जनावरांवर उपचारासाठी फायदा होईल, असे पशुसंवर्धन अधिकारी  ए. वाय. रेवघडे यांनी सांगितले.

इमारतीला वादाची किनार  आळसंद येथे उभारलेल्या पशुवैद्यकीय दवाखानाच्या इमारतीला पदाधिकाऱ्यांतील अंतर्गत वादाची किनार आहे. सरपंच व समर्थक सदस्यांनी पशुवैद्यकीय दवाखान्याच्या जुन्या इमारतीच्या जागी व्यापारी संकुल बांधण्याचा घाट घातला होता. वरिष्ठ पातळीवर प्रयत्न केला. परंतु, यश आले नाही. दुसऱ्या गटाने पशुवैद्यकीय दवाखाना बांधण्यासाठी जोरदार प्रयत्न केले. जिल्हा परिषद पदाधिकाऱ्यांनी पशुवैद्यकीय दवाखाना बांधण्याचा निर्णय घेतला. तो पूर्णही केला.