साताऱ्यातील बहुतांश भागात टोमॅटोवर विषाणूजन्य रोग

सातारा-ः जिल्ह्यातील शेतकऱ्यांवर संकटाची मालिका सुरूच आहे. ‘कोरोना’च्या पार्श्वभूमीवर सुरु असलेल्या लॅाकडाउनमुळे शेतकरी संकटात असताना आता टोमॅटोवर विषाणूजन्य रोगाचा प्रादुर्भाव वाढल्याने त्यात वाढ झाली आहे. हजारो हेक्टरवरील टोमॅटो पीक विषाणूजन्य रोगाच्या विळख्यात सापडल्याने लाखो रुपयांचे नुकसान झाले आहे.

जिल्ह्यात तीन हजार हेक्टर क्षेत्रावर उन्हाळी टोमॅटोची लागवड केली जाते. यामध्ये फलटण, कोरेगाव, कऱ्हाड, खंडाळा, वाई तालुक्यात टोमॅटोचे पिक घेतले जाते. पाण्याची उपलब्धतता चांगली असल्याने या हंगामात तीन हजार हेक्टर क्षेत्रावर लागवड झाली असल्याचा अंदाज आहे. फळे सुरू असतानाच टोमॅटोवर विषाणूजन्य रोगाचा प्रादुर्भाव झाल्याचे दिसून आले. यामध्ये फळे पिवळी होणे, आकार वेडावाकडा होणे, कापसासारखा मऊ होणे आदी प्रकाराची लक्षणे दिसत आहे. बाधित फळांच्या छायाचित्रावरून हा सीएमव्ही असण्याची शक्यता व्यक्त केली आहे.

मात्र, शास्त्रीय परीक्षण केल्यानंतरच अधिकृत निदान होणार आहे. भविष्यात निदान होईलही मात्र तोपर्यंत शेतकऱ्यांचे नुकसान सुरूच राहणार आहे. जिल्ह्यातील टोमॅटोच्या बहुतांशी प्लॅाटवर या विषाणूचा कमी अधिक प्रमाणात प्रादुर्भाव झाला असल्याचे सांगितले जात आहे. टोमॅटो प्लॅाट कोणत्या स्टेजला आहे यावर नुकसानीचे आकडे कमी जास्त होणार असले तरी किमान ५० टक्क्यांवर नुकसान ग्राह्य धरले तरी कोट्यावधी रुपयांचा फटका बसणार आहे. टोमॅटोत वापरली जात असलेली सुतळी तसेच अवजारांमुळे या विषाणूचा प्रादुर्भाव वाढत असल्याचे बोलले जात आहे.

‘कोरोना’मुळे लॅाकडाउन सुरू असल्यामुळे टोमॅटाची अपेक्षित विक्री होत नसून किलोला आठ रुपये दर हा देखील परवडत नाही. तरी शेतकरी लॅाकडाउनमध्ये शिथिलता आल्यावर विक्री करता येईल या आशेवर टोमॅटोचे संगोपन करीत आहेत. मात्र या विषाणूजन्य रोगामुळे शेतकरी आणखी अडचणीत आला आहे. फळाचे आकार, रंग यामध्ये मोठ्या प्रमाणात फरक पडण्याबरोबर फळे खराब होण्याचे प्रमाणही वाढत असल्याचे शेतकऱ्यांनी सांगितले. अनेक शेतकऱ्यांना हा रोग नीट समजत नसल्यामुळे फवारणीचा खर्च वाढला आहे.

या संदर्भात कृषी विभागाशी संपर्क केला असता अजूनही शेतकऱ्यांकडून याबाबत कोणताही तक्रार अर्ज आला नसल्याचे सांगण्यात आले. या विषाणूजन्य रोगाचा वेळेत बंदोबस्त न झाल्यास भविष्यात टोमॅटोच्या क्षेत्रात घट होणार आहे.

 प्रादुर्भाव झालेल्या टोमॅटो पिकाची पाहणी करण्याच्या सूचना तालुका कृषी अधिकाऱ्यांना केल्या आहेत. प्रत्यक्ष पाहणी केल्यावर तज्ज्ञांकडे माहिती पाठवली जाईल, अशी माहिती जिल्हा अधीक्षक कृषी अधिकारी  महेश झेंडे यांनी दिली.