सातारा जिल्ह्यात पाणीटंचाई वाढू लागली

सातारा : ‘कोरोना’च्या पार्श्वभूमीवर निर्माण झालेल्या परिस्थितीमुळे अडचणीत असलेल्या नागरिकांना आता पाणीटंचाईच्या झळा सोसण्याची वेळ आली आहे. माण, खटाव या दुष्काळग्रस्त तालुक्यांसह वाई, पाटण तालुक्यात सहा टँकरद्वारे पाणीपुरवठा केला जात आहे. उन्हाची तीव्रता वाढत असल्याने पाणीटंचाईत वाढ होत असून टँकरची मागणी वाढली आहे.

‘कोरोना’च्या पार्श्वभूमीवर जिल्ह्यात सर्वत्र लॅाकडाउन सुरू आहे. जिल्ह्यात सध्या कोरोनाग्रस्त रुग्णांची संख्या १४ वर गेली असल्याने प्रशासनाकडून लॅाकडाउन कडक करण्यात आले आहे. हे संकट सुरू असतानाच माण, खटाव या दुष्काळग्रस्त तालुक्यांसह वाई व पाटण तालुक्यात पाणीटंचाईचे संकट आहे. पिण्याची पाण्याची टंचाई भासत असल्याने प्रशासनाकडून टँकरद्वारे पाणी पुरवठा केला जात आहे.

सध्या या चार जिल्ह्यांतील पाच गावे व दहा वाड्यावस्त्यांवरील चार हजार ८६१ नागरिकांना सहा टँकरद्वारे पाणी पुरवठा केला जात आहे. यामध्ये माण तालुक्यातील एक गाव, पाच वाड्यावस्त्यांवरील ९५५ नागरिकांना एका टँकरद्वारे, खटाव तालुक्यातील एक गाव व एका वाडीवस्तीवरील १४१ नागरिकांना एका टँकरव्दारे, वाई तालुक्यातील एका गावातील एक हजार ४५५ नागरिकांना एक टँकरद्वारे तर पाटण तालुक्यातील दोन गावे व चार वाड्यावस्त्यांवरील दोन हजार ३०२ नागरिकांना तीन टँकरद्वारे पाणी पुरवठा केला जात आहे. तसेच खटाव, वाई व पाटण तालुक्यातील एक हजार ६३२ पशूधन पाणीटंचाईचा सामना करीत आहे.