नगर जिल्ह्यात ९३ टॅंकरव्दारे पाणीपुरवठा

नगर  ः नगर जिल्ह्यात उन्हाची तीव्रता दिवसेंदिवस वाढत असल्याने पाणी टंचाईचे सावटही जाणवू लागले. जिल्ह्यात पाणी पुरवठा करणाऱ्या टॅंकरचा आकडा शंभरीजवळ पोहचू लागला आहे. सध्या जिल्ह्यातील ८८ गावे व ३५० वाड्या-वस्त्यांवरील एक लाख ५६ हजार ५८६ नागरिकांची तहान भागविण्यासाठी जिल्हा प्रशासनाने ९३ टॅंकरव्दारे पाणी पुरवठा सुरु केला आहे.

जिल्ह्यात गेल्या वर्षी पावसाने कहर केला. उन्हाळ्यात टॅंकरच्या आकड्याने अठरा वर्षांचे रेकॉर्ड मोडत उच्चांक गाठला होता. मागील वर्षी जिल्ह्यातील ५७२ गावे व ३२०० वाड्या-वस्त्यांवरील १३ लाख ४९ हजार नागरिकांची तहान भागविण्यासाठी जिल्हा प्रशासन ८२७ टॅंकरव्दारे पाणीपुरवठा करीत होत. यंदाच्या उन्हाळ्यात पाण्याची स्थिती चांगली राहिल्याने टॅंकरला मागणी उशिरा आली.

यंदा एप्रिलच्या सुरवातीला जिल्ह्यातील पठार भागातून टॅंकरचे प्रस्ताव येण्यास सुरवात झाली. सुरवातीला टॅंकर मंजुरीचे अधिकार जिल्हाधिकाऱ्यांकडे होते. मात्र, कोरोना प्रतिबंधात्मक उपाययोजनांची व्यवस्था लक्षात घेऊन सरकारने ते प्रांताधिकाऱ्यांकडे दिले आहेत. आजअखेर जिल्ह्यातील दहा तालुक्‍यांत टॅंकरद्वारे पाणीपुरवठा करण्यात येत आहे. त्यात शासकीय २५, तसेच खासगी ६८ टॅंकरचा समावेश आहे   तालुकानिहाय टॅंकर ः संगमनेर ९, अकोले २, नेवासे १, नगर १६, पारनेर १८, पाथर्डी ५, शेवगाव ४, कर्जत १३, जामखेड १९, श्रीगोंदे ६.