हलक्या पावसामुळे वाढली धास्ती

पुणे  ः अरबी समुद्राच्या दक्षिण भागात सक्रिय असलेले कमी दाबाचे क्षेत्र येमेनकडे सरकत आहे. या कमी दाब क्षेत्राच्या प्रभावामुळे आज (बुधवारी) आणि उद्या (गुरुवारी) कोकण व मध्य महाराष्ट्रात हवामान अंशतः ढगाळ राहणार आहे. मात्र कमी दाबाची स्थिती निवळून गेल्यानंतर गारठा पुन्हा वाढण्याची शक्यता असल्याचे हवामान विभागाच्या सूत्रांनी सांगितले.

राज्यातील ढगाळ हवामानामुळे किमान तापमानात वाढ होऊन थंडी कमी झाली आहे. कोकण, मध्य महाराष्ट्राच्या काही भागांत मंगळवारी (ता. ३) ढगाळ हवामान होते. यामुळे किमान तापमान सरासरीच्या तुलनेत सहा अंश सेल्सिअसपर्यंत वाढले आहे. सोमवारी सिंधुदुर्ग जिल्ह्यातील अनेक भागांत पावसाच्या सरी बरसल्या. कोल्हापूर,नगर आणि साताऱ्यातील काही भागात पावसाने हजेरी लावली.

मध्य महाराष्ट्रातील काही भागांत हवामान कोरडे असल्याने किंचित गारठा जाणवत आहे. नगर, पुणे, सातारा, सांगली, कोल्हापूर, सिंधुदुर्ग या भागात मंगळवारी दिवसभर ऊन आणि ढगाळ हवामानामुळे कमाल तापमान आणि उकाड्यातही किंचित वाढ झाली आहे. मंगळवारी (ता. ३) सकाळी महाबळेश्वर येथे राज्यातील नीचांकी १५.० अंश सेल्सिअस किमान तापमानाची नोंद झाली आहे. विदर्भातील अनेक भागांत किमान तापमान कमी झाल्याने काही प्रमाणात गारठा जाणवत आहे.

विदर्भातील गोंदिया येथे १५.५ अंश सेल्सिअस तापमानाची नोंद झाली आहे. त्यापाठोपाठ नागपूरमध्ये १५.८ अंश सेल्सिअस तापमान नोंदविले गेले. मराठवाड्यातही किमान तापमान १५ ते १८ अंश सेल्सिअसच्या दरम्यान होते. मध्य महाराष्ट्रातील नाशिक, मालेगाव, जळगाव येथील तापमानात सरासरीच्या तुलनेत पाच ते सहा अंश सेल्सिअसपर्यंत वाढ झाली असून किमान तापमान १५ ते २० अंश सेल्सिअसदरम्यान होते. कोकणात अद्याप थंडी वाढलेली नसून किमान तापमान २३ ते २४ अंश सेल्सिअसच्या दरम्यान होते.  

मंगळवारी (ता. ३) सकाळी विविध ठिकाणी असलेले किमान तापमान, अंश सेल्सिअसमध्ये, कंसात वाढ, घट ः अकोला १६.७ (२), अलिबाग २३.१ (३), अमरावती १६.६, औरंगाबाद १६.६ (४), बीड १८.८ (५), बुलडाणा १७.३(२), चंद्रपूर १९.४ (५), डहाणू २३.७ (४), गोंदिया १५.५ (२), जळगाव १८.४ (५), कोल्हापूर १९.१ (३), महाबळेश्वर १५.० (१), मालेगाव १९.० (६), मुंबई २३.७ (४), नागपूर १५.८ (२), नांदेड २०.० (६), नाशिक १८.० (६), उस्मानाबाद १६.० (२), परभणी १८.३ (४), लोहगाव १९.४ (६), पुणे १८.३ (६), रत्नागिरी २४.६ (३), सांगली २०.० (४), सातारा १९.५ (५), सोलापूर २०.६ (४), ठाणे २३.०, वर्धा १६.९ (२), यवतमाळ १६.४ (१).