सोलापूर जिल्हा परिषद शेतकऱ्यांसाठी देणार स्लरी फिल्टर 

सोलापूर  ः फळबागांसाठी उपयुक्त असलेल्या स्लरी फिल्टरचे वाटप शेतकऱ्यांना करण्यात येणार आहे. पुढील आर्थिक वर्षापासून या नव्या योजनेचा समावेश शेतकऱ्यांच्या फायद्यासाठी होणार असल्याचे जिल्हा परिषदेच्या कृषी व पशुसंवर्धन समितीचे सभापती अनिल मोटे यांनी सांगितले. 

सभापती मोटे यांच्या अध्यक्षतेखाली नुकतीच कृषी समितीची बैठक झाली. बैठकीसाठी रेखा राऊत, संगीता मोरे, दादासाहेब बाबर, रजनी भडकुंबे, जिल्हा कृषी विकास अधिकारी एस. पी. बेंदगुडे उपस्थित होते. श्री. मोटे म्हणाले, की नव्या आर्थिक वर्षात कृषी विभागासाठी पाच कोटी पाच लाख रुपयांच्या निधीची तरतूद करण्याची मागणी जिल्हा परिषदेच्या अध्यक्षांकडे केली आहे. त्याचबरोबर या बैठकीत नव्याने एक हजार २९९ लाभार्थींच्या नावाला मंजुरी देण्यात आली. आतापर्यंत दोन हजार ५४३ लाभार्थींनी वेगवेगळ्या प्रकारच्या साहित्याची खरेदी केली आहे. उर्वरित लाभार्थींनीही आपल्या वस्तू खरेदी करण्याचे आवाहन सभापती मोटे यांनी केले आहे.