तूर खरेदीसाठी हमी देण्याबाबत मंत्रिमंडळ बैठकीत निर्णय ः उपमुख्यमंत्री अजित पवार

मुंबई ः ‘‘राज्यात सध्या ३१७ तूर खरेदी केंद्रे सुरू असून, तूर विक्रीसाठी येणाऱ्या शेतकऱ्यांना कोणतीही अडचण येऊ देऊ नये. तूर साठवण्यासाठी पुरेशा गोण्या उपलब्ध ठेवाव्यात. नोंदणी केलेल्या शेतकऱ्यांकडील संपूर्ण तूर खरेदी करावी,’’ अशा सूचना उपमुख्यमंत्री अजित पवार यांनी कृषी आणि पणन विभागाच्या अधिकाऱ्यांना दिल्या. तूर खरेदीसाठी आवश्यक असलेली २०० कोटी रुपयांची हमी देण्याचा प्रस्ताव मंत्रिमंडळाच्या बैठकीत मांडावा त्यास मान्यता देण्यात येईल असेही श्री. पवार यांनी स्पष्ट केले.

उपमुख्यमंत्री अजित पवार यांच्या अध्यक्षतेखाली मंगळवारी (ता.२५) विधानभवनात आयोजित बैठकीत राज्यातील तूर उत्पादन आणि खरेदीचा आढावा घेण्यात आला. या वेळी कृषीमंत्री दादा भुसे, सहकारमंत्री बाळासाहेब पाटील आदींसह कृषी, पणन, भारतीय अन्न महामंडळाचे वरिष्ठ अधिकारी उपस्थित होते.

सोयाबीनमध्ये आंतरपीक घेतलेल्या तुरीचे लागवडीखालील पूर्ण क्षेत्र ग्राह्य धरून उत्पादकता निश्चित करण्यात येणार आहे व त्यानुसार तूर खरेदी करण्यात येणार असल्याची माहितीही या वेळी देण्यात आली.

तीन लाख शेतकऱ्यांची तूर विक्रीसाठी नोंदणी यंदा राज्यात तूर विक्रीसाठी ३ लाख १५ हजार शेतकऱ्यांनी नोंदणी केली असून, १ फेब्रुवारीपासून खरेदी सुरू झाली आहे. यंदा २ लाख २४ हजार ३८५ टन तूर खरेदीचे उद्दिष्ट निश्चित करण्यात आले आहे.