खानदेशात सीसीआयची कापूस खरेदी लवकरच

जळगाव  ः खानदेशात भारतीय कापूस महामंडळाची (सीसीआय) कापूस खरेदी सुरू झालेली नाही. परंतु, लवकरच ही खरेदी सुरू होईल, अशी शक्‍यता आहे. सीसीआयचे केंद्र निश्‍चित असलेल्या क्षेत्रातील बाजार समित्यांतर्फे कापूस विक्रीसंबंधी शेतकऱ्यांना टोकन दिले जाणार आहे. या टोकन वितरणासाठी सॉफ्टवेअरची जुळवाजुळव केली जाणार आहे.

सीसीआयची खरेदी सुरू करण्यासंबंधी केंद्रधारक (जॉब वर्कर्स) कारखानदारांची बैठक शुक्रवारी (ता.१) झाली. या बैठकीत खरेदी सुरू करण्याचा निर्णय झाला. तसेच फक्त एफएक्‍यू कापूस खरेदी सुरू करण्याबाबत मंथन झाले. कारण कमी दर्जाचा कापूस खरेदी केला तर त्यात हवा तसा उतारा मिळणार नाही. दुसरीकडे शेतकऱ्यांचे नुकसानही व्हायला नको, याबाबत कारखानदारांनी मुद्दे मांडले.

सीसीआयतर्फे खानदेशात धुळ्यातील शिरपूर, शहादा (ता.नंदुरबार), जळगावमधील बोदवड, भुसावळ, जामनेर, पहूर (ता.जामनेर), शेंदूर्णी (ता.जामनेर), पाचोरा, जळगाव, चोपडा येथे कापूस खरेदी सुरू केली जाणार आहे.

केंद्रात कापसाच्या खरेदीनंतर त्याचा ढीग लावणे, जिनींग करणे (रुई निर्मिती), प्रेसिंग (दबाई) व गाठी बांधणे यासाठी मजुरांची मोठी आवश्‍यकता आहे. या कामात मध्य प्रदेशातील सेंधवा, खरगोन, बडवानी, बऱ्हाणपूर भागातील मजूर पारंगत आहेत. स्थानिक मजूर हे काम करायला तयार नसतात. लॉकडाऊनमुळे परराज्यातील मजूर उपलब्ध करून घेताना अडचणी येत असून, त्यासाठी प्रशासनाने सहकार्य करावे, अशी मागणी कारखानदार, केंद्रधारक करीत आहेत.

  महासंघाची खरेदी वेगात पणन महासंघाची कापूस खरेदी वेगात सुरू असून, पाच केंद्रांवर सुमारे साडेनऊ हजार क्विंटल कापूस खरेदी झाला आहे. जळगाव जिल्ह्यात महासंघाची खरेदी सुरू आहे. शेतकऱ्यांना चुकारे अद्याप दिले नसल्याची माहिती मिळाली.