नांदेडमध्ये ४७ कोटी ४७ लाखांचे पीक कर्ज वाटप

नांदेड : नांदेड जिल्ह्यातील बॅंकांनी सोमवारपर्यंत (ता.१) ७२८४ शेतकऱ्यांना ४७ कोटी ४७ लाख ६६ हजार रुपयांचे पीककर्ज वाटप केले आहे. पीककर्ज मागणीसाठी जिल्ह्यातील १ लाख ९९ हजार ७०० शेतकऱ्यांनी आॅनलाइन नोंदणी केली असल्याची माहिती सूत्रांनी दिली.

जिल्ह्यातील विविध बॅंकांना यंदाच्या खरिपात एकूण २ हजार ३१ कोटी ६७ लाख ७० हजार रुपयांचे पीककर्ज शेतकऱ्यांना वाटप करण्याचे उद्दिष्ट देण्यात आले आहे. त्यात जिल्हा मध्यवर्ती सहकारी बॅंकेला १८५ कोटी ७४ लाख ८२ हजार रुपये, व्यापारी बॅंकांना १ हजार ५५७ कोटी ६७ लाख ३८ हजार रुपये, महाराष्ट्र ग्रामीण बॅंकेला २८८ कोटी २५ लाख ५० हजार रुपयांचे उद्दिष्ट देण्यात आले आहे.

जिल्हा मध्यवर्ती सहकारी बॅंकेने ५ हजार ९६३ शेतकऱ्यांना ३१ कोटी ५७ लाख ६६ हजार रुपये, महाराष्ट्र ग्रामीण बॅंकेने ३५० शेतकऱ्यांना २ कोटी ८९ लाख रुपये, व्यापारी बॅंकांनी ९७१ शेतकऱ्यांना १३ कोटी १ लाख रुपये असे एकूण ७ हजार २८४ शेतकऱ्यांना ४७ कोटी ४७ लाख ६६ हजार रुपयांचे पीककर्ज वाटप केले. जिल्हा बॅंक कर्जवाटपात पुढे असली तरी व्यापारी, खाजगी, ग्रामीण बॅंक मात्र कर्जवाटपात पिछाडीवर आहेत.