सातारा जिल्हा बॅंकेकडून गरजूंसाठी दोन कोटींची मदत 

सातारा  : ‘कोरोना’च्या पार्श्वभूमीवर सातारा जिल्हा मध्यवर्ती सहकारी बँकेने जिल्ह्यातील गरजू कुटुंबांना जीवनावश्यक अन्नधान्याच्या किटसाठी एक कोटी व मुख्यमंत्री सहायता निधीसाठी एक कोटी अशी दोन कोटींची मदत दिल्याची माहिती बँकेचे अध्यक्ष, आमदार शिवेंद्रसिंहराजे भोसले यांनी दिली. 

श्री. भोसले म्हणाले, की ‘कोरोना’च्या पार्श्वभूमीवर सुरू असलेल्या लॉकडाउनमुळे मजूर, स्थलांतरित कुटुंबांवर उपासमारीची वेळ आली आहे. त्यांना या संकटातून बाहेर काढण्यासाठी पंतप्रधान, मुख्यमंत्र्यांनी सामाजिक भावनेतून या नागरिकांची जबाबदारी घेण्याचे आवाहन केले आहे. त्यानुसार जिल्ह्यामधील स्थलांतरित, तसेच मोलमजुरी करणारे मजूर व गरजू कुटुंबांना त्यांच्या दैनंदिन उदरनिर्वाहासाठी अन्नधान्याचे कीट उपलब्ध करून देण्याचा निर्णय बँकेने घेतला आहे. जिल्हाधिकाऱ्यांच्या सूचनेप्रमाणे बँकेने संबंधित तहसीलदारांकडून गरजू लाभार्थ्यांची यादी प्राप्त करून घेतली आहे.

या यादीनुसार संबंधितांना महसूल विभाग व बँकेच्या माध्यमातून अन्नधान्याचे कीट उपलब्ध करून दिले जाणार आहे. त्यात तेल, तांदूळ, साखर, चटणी, हळद, गहू, आटा इत्यादी वस्तूंचा समावेश केला आहे. सर्वसाधारण १७,५०० किटचे वितरण गरजू कुटुंबांना केले जाणार आहे. या किटसाठी बँक एक कोटी खर्च करणार आहे. तसेच जिल्हा बँकेच्या संचालक मंडळाने मुख्यमंत्री सहायता निधीसाठी आर्थिक मदत करण्याचाही निर्णय घेतला आहे. त्यानुसार बँकेने संचालक मंडळ सदस्यांचा सभाभत्ता व बँक अधिकारी/ सेवकांचे एक दिवसाचे वेतन मिळून १६ लाखांची मदत मुख्यमंत्री सहायता निधीस करण्यात आली. हा धनादेश बँकेचे मुख्य कार्यकारी अधिकारी डॉ. राजेंद्र सरकाळे यांनी जिल्हाधिकारी शेखर सिंह यांच्याकडे सुपूर्द केला आहे. तसेच २०१९-२० या आर्थिक वर्षाच्या नफ्यातून मुख्यमंत्री सहायता निधीस एक कोटी देण्याचा निर्णयही बँकेच्या संचालक मंडळाने घेतला आहे.