मळीवरील निर्यातबंदी उठविली

मुंबई : राज्यात ‘कोरोना’च्या प्रादुर्भावामुळे मद्य आणि मद्यार्क मागणीचे व्यवहार कमी झाले आहेत. त्यामुळे मळी उपलब्धतेत वाढ झाली आहे. त्यामुळे उसाच्या मळीच्या निर्यातीवरची बंदी उठविण्याचा निर्णय राज्य सरकारने घेतला आहे. यासंदर्भातील शासन निर्णय सोमवारी (ता. २९) जारी करण्यात आला आहे.

आधीच्या वर्षीच्या तुलनेत २०१९-२० या वर्षीचे मळीचे उत्पादन कमी होण्याच्या शक्यतेपोटी राज्यात मळीच्या परराज्यात तसेच परदेशात निर्यातीवर बंदी घालण्यात आली होती. मळीचा तुटवडा झाल्यास त्याचे परिणाम देशी-विदेशी मद्य, ईएनए तसेच इथेनॉलनिर्मिती असणाऱ्या मद्यार्कांवरही होण्याची शक्यता असते.

१ नोव्हेंबर २०१९ ला राज्यातील साखर कारखान्यांमध्ये सुमारे ३ लाख मेट्रिक टन मळी शिल्लक होती. चालू वर्षी अंदाजापेक्षा जास्त म्हणजे सुमारे २४ लाख मेट्रिक टन मळीचे उत्पादन झाले. ९ जून २०२० ला साखर कारखान्यांकडे सुमारे ८ लाख ४७ हजार टन आणि आसवनींकडे ५ लाख ४३ हजार टन, अशी एकूण १३ लाख ९० हजार टन मळी शिल्लक आहे. तसेच, साखर आयुक्तांच्या अंदाजानुसार २०२०-२१ या साखर हंगामात अपेक्षित ९५० लाख टन उसाचे गाळप झाल्यास सुमारे ३६ ते ३८ लाख मळीचे उत्पादन अपेक्षित आहे.

मात्र, राज्यात कोरोनाच्या प्रादुर्भावामुळे मद्य आणि मद्यार्क मागणीचे व्यवहार कमी झाले आहेत. परिणामी, मळीच्या उपलब्धतेत वाढ झाली आहे. त्यामुळे ३० सप्टेंबर २०२० पर्यंत घालण्यात आलेली निर्यातबंदी २९ जूनच्या शासन निर्णयाद्वारे तातडीच्या प्रभावाने उठविण्यात आली आहे. मळी निर्यातीच्या परवानगीवर केंद्रीयरीत्या नियंत्रण ठेवण्यासाठी मळीनिर्यातीची परवानगी देण्याचे अधिकार आयुक्त, राज्य उत्पादन शुल्क यांना देण्यात येत आहेत. याबाबत त्यांनी सविस्तर कार्यप्रणाली निश्चित करून निर्यातदार घटकांना निर्यातीची परवानगी द्यावी, असेही या आदेशात म्हटले आहे.