सांगलीतील द्राक्ष उत्पादकांचा ओढा बेदाणा निर्मितीकडे

सांगली  : द्राक्षांची वाहतूक सुरु झाली असली तरी संचारबंदीमुळे बाजारपेठेत द्राक्षांना मागणी घटली आहे. त्यामुळे जिल्ह्यातील द्राक्ष उत्पादक शेतकरी बेदाणा निर्मितीकडे वळाले आहेत.

जिल्ह्यात सुमारे ३० ते ४० टक्के द्राक्ष हंगाम शिल्लक आहे. दोन दिवसांपासून जिल्ह्यातून द्राक्ष वाहतूक सुरु झाली आहे. दोन दिवसांत सुमारे १५० ते २०० गाड्या देशभरात गेल्या आहेत. मात्र, देशभरातील मुख्य बाजारपेठा बंद आहेत. त्यामुळे द्राक्ष विक्रीस अडचणी निर्माण झाल्या आहेत. त्यामुळे जिल्ह्यातील शेतकऱ्यांनी स्वतः द्राक्ष विक्रीसाठी पाऊले उचलली आहेत. काही बाजारपेठेतही द्राक्षांची विक्री होत आहे.

परंतु, संचारबंदी असल्याने द्राक्षाला अपेक्षित मागणी नाही. त्यामुळे बाजारपेठेत गेलेली द्राक्षे कशी विकली जाणार असा प्रश्न द्राक्ष उत्पादकांना पडला आहे. तासगाव, मिरज, कवठेमहांकाळ आणि जत तालुक्यात दर्जेदार बेदाणा तयार केला जात आहे. परंतू ‘कोरोना’च्या पार्श्वभूमीवर द्राक्षाला मागणी कमी झाली असल्याचे द्राक्ष उत्पादकांनी सांगितले. त्यामुळे बेदाणा निर्मितीसाठी शेतकरी पुढाकार घेत आहेत.

ज्या भागातील बेदाणा शेड बंद होते, त्याची दुरुस्ती करण्यास शेतकऱ्यांनी सुरवात केली आहे. दोन दिवसांत बेदाणा शेडची दुरुस्ती करुन बेदाणा तयार करण्यासाठी द्राक्षे रॅकवर टाकली जाणार आहेत,अशी माहिती द्राक्ष उत्पादकांनी दिली.