Farmers Market : औरंगाबाद येथे शेतकरी आठवडे बाजार सुरु

जवळपास वीस मार्चपासून बंद पडलेले शेतकरी आठवडे बाजार ‘कोरोना’च्या पार्श्वभूमीवर नियमांचे पालन करून पुन्हा सुरू झाल्याने आम्हाला फळे ,भाजीपाला ,धान्य विक्रीची संधी मिळाली. - विलास भेरे, कोनेवाडी, जि. औरंगाबाद.
आठवडे बाजारात गर्दी होऊ नये यासाठी आखलेले सर्कल
आठवडे बाजारात गर्दी होऊ नये यासाठी आखलेले सर्कल

औरंगाबाद  ः'कोरोना’च्या पार्श्वभूमीवर बंद पडलेला शेतकरी आठवडे बाजार पुन्हा एकदा सुरू करण्यात आला आहे. परंतु आता हा बाजार सुरू करताना आता सोशल डिस्टन्स तसेच अन्य खबरदारीही घेतली जात आहे.

औरंगाबाद शहरात पणन व कृषी विभागाच्या समन्वयातून थेट शेतमाल विक्रीचा प्रश्न निकाली काढण्यासाठी संत शिरोमणी श्री सावता माळी शेतकरी आठवडे बाजार सुरू करण्यात आले होते. ‘कोरोना’च्या पार्श्वभूमीवर २० मार्चपासून महानगरपालिकेच्या क्षेत्रात जवळपास तीन ठिकाणी भरवण्यात येणारे हे बाजार गर्दी टाळण्यासाठी बंद करण्यात आले होते. त्यानंतर ग्राहक व किरकोळ खरेदीदारांची जाधववाडी बाजार समितीत फळे व भाजीपाला खरेदीसाठी गर्दी होऊ लागली. ही गर्दी थांबवण्यासाठी प्रशासनाच्या माध्यमातून थेट शेतकऱ्यांमार्फत ग्राहकांना फळे, भाजीपाला, धान्य विक्री करण्याचे नियोजन करण्यात आले.

जिल्ह्यातील विविध गावांतील शेतकरी गटांनी त्या अनुषंगाने कृषी विभागाकडे आपल्याकडे उपलब्ध असलेल्या फळे, भाजीपाला व धान्याची माहिती नोंदविली. त्यानंतर कृषी, महसूल व महानगरपालिका यांच्या समन्वयातून पुन्हा एकदा रविवारी (ता. २९) शेतकरी आठवडे बाजार सुरु करण्यात आला. जिल्हा अधिक्षक कृषी अधिकारी कार्यालय परिसरातील उपविभागीय कृषी अधिकारी कार्यालयासमोर हा शेतकरी आठवडे बाजार भरवण्यात आला.

या बाजारात येणाऱ्या शेतकरी व ग्राहकांसाठी हात धुण्याकरिता पाणी, साबण व हॅन्डवॉशची सोय करण्यात आली. याशिवाय सोशल डिस्टन्स ठेवण्यासाठी ग्राहकांकरिता सर्कल आखण्यात आले. मास्क, हँडग्लोजचा वापर शेतकरी व ग्राहक करीत होते. या आठवडे बाजारात रविवारी सकाळी आठ ते अकरा वाजेदरम्यान एक टनाच्या आसपास फळे व भाजीपाला विक्री झाली होती. जवळपास सहा शेतकरी गट विक्री प्रक्रियेत सहभागी झाले होते. आता अशाच प्रकारे नियमांचे पालन करून आठवड्यात बुधवारी दशमेश नगरमध्ये तसेच शुक्रवारी ज्योतीनगर येथेही शेतकरी आठवडे बाजार सुरू करणार असल्याची माहिती कोनेवाडी येथील शेतकरी गटाचे प्रमुख विलास भेरे यांनी दिली.  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com