खासदार औद्योगिक महोत्सवाच्या माध्यमातून ग्रामीण उद्योगांना प्रोत्साहन : केंद्रीय मंत्री नितीन गडकरी

नागपूर  ः खासदार औद्योगिक महोत्सवाच्या माध्यमातून विदर्भातील कृषी व ग्रामीण उद्योगांना प्रोत्साहन देण्याचा प्रयत्न करण्यात येणार असल्याची माहिती केंद्रीय मंत्री नितीन गडकरी यांनी दिली.  

खासदार औद्योगिक महोत्सवाची माहिती देण्यासाठी आयोजित पत्रकार परिषदेत श्री. गडकरी बोलत होते. १४ ते १६ मार्च दरम्यान हे प्रदर्शन आयोजित करण्यात येणार असून, त्याचे उद्‌घाटन उद्योगमंत्री सुभाष देसाई यांच्या हस्ते होणार आहे. या अंतर्गत राष्ट्रीय औद्योगिक परिषद होणार आहे. 

याबाबत श्री. गडकरी म्हणाले, की लघू उद्योगासाठी केंद्र सरकारच्या अनेक योजना आहेत. त्याचा प्रसार औद्योगिक महोत्सवाच्या माध्यमातून केला जाणार आहे. विदर्भात याव्दारे कृषी व ग्रामीण लघू उद्योगांना प्रोत्साहन देण्याचा प्रयत्नही होणार आहे. ज्या गावात कापूस पिकतो त्याच गावात सौर चरख्याव्दारे कापड तयार करण्यासाठी लघू उद्योग उभारण्याला प्रोत्साहन दिले जाणार आहे. याव्दारे एकाच तालुक्‍यात चार हजार लोकांना रोजगार मिळेल. खादी ग्रामोद्योगांच्या माध्यमातून हा प्रकल्प राबविला जाईल. 

‘पैठणीची विक्री पोस्टाच्या माध्यमातून’ भंडारा जिल्ह्यातील आंधळगावात पैठणी तयार होईल, यासाठी प्रयत्न केले जाणार आहेत. त्यासोबतच पैठणीची विक्री देशातील पोस्ट ऑफिसच्या माध्यमातून करण्याचे नियोजन आहे. त्याकरिताचा प्रस्ताव अंतिम टप्प्यात असल्याचेही गडकरी यांनी सांगितले.