नगर जिल्ह्यात पीककर्ज वाटपात राष्ट्रीयीकृत बॅंकांचा हात आखडताच

नगर  ः खरीप हंगामासाठी पीककर्ज पुरवठ्याकडे यंदा बॅंकांचे दुर्लक्ष असल्याचे दिसून येत आहे. खरीप हंगाम तोंडावर आलेला असताना जिल्ह्यात शुक्रवारपर्यंत (ता.५) ५४३ कोटींचे पीककर्ज वाटप झाले आहे. गेल्यावर्षी आत्तापर्यंत जवळपास ४० टक्क्यांपर्यंत कर्जवाटप झाले होते. उद्दिष्टाचा विचार करता आत्तापर्यंत सुमारे १६ ते १७ टक्केच कर्ज वाटप झाले आहे. जिल्हा बॅंकेने उद्दिष्टाच्या ३४ टक्के कर्ज वाटप केले असले तरी या बॅंकेचीही कर्जवाटपात गतवर्षीच्या तुलनेत उदासीनता दिसून येत आहे. तसेच राष्ट्रीयीकृत बॅंकांनी पीककर्ज वाटपात हात आखडता घेतला आहे. या बॅंकांना १९१२ कोटींचे उद्दिष्ट असताना आत्तापर्यंत केवळ ८३ कोटींचे पीककर्ज वितरित केले आहे.

नगर जिल्ह्यात यंदा खरीप, रब्बीसाठी ५ लाख ७८ हजार ५१२ शेतकऱ्यांसाठी ५२५० कोटी ४५ लाख रुपये कर्ज पुरवठा करण्याचे उद्दिष्ट आहे. यंदा खरिपासाठी ३ लाख ७४ हजार ४२८ शेतकऱ्यांना ३ हजार ४१० कोटी रुपयांचे पीककर्ज वाटपाचे नियोजन आहे. मात्र ‘कोरोना’च्या पार्श्वभूमीवर गेल्या दोन महिन्यांपासून बॅंकांमध्ये बहुतांश कामकाज बंद असल्याने कर्ज वाटपाकडे दुर्लक्ष केले जात असल्याचे दिसून येत आहे. आत्तापर्यंत जिल्हा बॅंकेने ४१ हजार ९४१ शेतकऱ्यांना ४५९ कोटी ३० लाख तर राष्ट्रीयीकृत बॅंकांनी १९१२ शेतकऱ्यांना ८३ कोटी ७७ लाखांचे पीककर्ज वाटप केले असल्याची माहिती अग्रणी बॅंकेचे व्यवस्थापक एस.एम. वालावलकर यांनी दिली. राष्ट्रीयीकृत व खाजगी २७ बॅंकापैकी ११ बॅंकांनी आत्तापर्यंत एकही रुपया वितरित केलेला नाही. त्यामुळे ऐन खरिपात कर्ज न मिळाल्याने खते, बियाणांसह अन्य साहित्य खरेदी करण्याला अडचणी निर्माण झाल्या आहेत. 

नगर जिल्ह्याची स्थिती