जळगावात खासगी डेअरी चालक, विक्रेत्यांकडून दूध खरेदी दरात घट

जळगाव  ः जिल्ह्यात दुधाच्या वितरणात येणाऱ्या अडचणी, दुग्धजन्य पदार्थांना कमी मागणी व मजुरीबाबतच्या समस्या लक्षात घेता खासगी डेअरी चालक, विक्रेत्यांनी शेतकऱ्यांकडील दूध खरेदीचे दर मागील दोन दिवसांत कमी केले आहेत. गायीच्या दूधाचे खरेदीदर तब्बल आठ ते नऊ रुपये प्रतिलिटरने कमी करण्यात आले आहेत. म्हशीच्या दुधाचे खरेदीदरही सात ते आठ रुपये लिटरने कमी झाल्याची माहिती आहे.

खासगी डेअरीचालक, गावांमधून दूध खरेदी करून शहरात विक्री करणारे किरकोळ विक्रेते, डेअरीचालक गायीचे दूध २९ ते ३१ रुपये लिटर या दरात शेतकऱ्यांकडून खरेदी करीत होते. म्हशीच्या दुधाची खरेदी ४१ ते ४५ रुपये प्रतिलिटर या दरात खरेदी केली जात होती. शहरात तसेच विविध भागांत ग्राहकांना ५५ ते ६० रुपये लिटर या दराने म्हशीच्या दुधाची विक्री केली जात होती. गायीच्या दुधाची विक्री ४२ ते ४५ रुपये प्रतिलिटर या दरात केली जात होती.

सध्या विक्री दर खासगी डेअरीचालक, किरकोळ विक्रेत्यांनी कमी केलेले नाहीत. परंतु शेतकऱ्यांकडून खरेदी केल्या जाणाऱ्या दुधाचे दर कमी करण्यात आले आहेत. त्यात म्हशीच्या दुधाची खरेदी ३८ ते ३५ रुपये लिटर या दरात आणि गायीच्या दुधाची खरेदी २३ ते २४ रुपये लिटर या दराने केली जात आहे. इंधन मिळण्यातील अडचणी, वाढती मजुरी, मजुरांचा अभाव व दुग्धजन्य पदार्थ वितरण, विक्रीची विस्कळीत साखळी, अशी कारणे खासगी डेअरीचालक दूध खरेदी दर कमी करण्यामागे देत आहेत. जिल्ह्यात सुमारे चार लाख लिटर दूध खरेदी विक्रीची उलाढाल खासगी डेअरी चालक, किरकोळ विक्रेत्यांच्या माध्यमातून होत असते.

जळगाव जिल्हा सहकारी दूध संघाचे खरेदी व विक्री दर स्थिर आहेत. सध्या सव्वातीन लाख लिटर दूध संकलन असून, त्यात घट झालेली नाही. परंतु विक्री मागील काही दिवसांत प्रतिदिन ५० हजार लिटरने कमी झाली आहे. संघाच्या दुधासह दुग्धजन्य पदार्थांची विक्री बुलडाणा, नाशिक, औरंगाबाद, अकोला येथेही केली जाते. रोज दिड लाख लिटर दुधाची विक्री होत होती. ती सध्या एक लाख लिटरपर्यंत होत आहे. जळगाव शहरासह इतर भागात दूध व दुग्धजन्य पदार्थ विक्रीची दुकाने सकाळी व सायंकाळीच सुरू असतात. ती २४ तास सुरू राहायला हवीत, असे मत दूध संघाचे कार्यकारी संचालक मनोज लिमये यांनी व्यक्त केले.

जे दूध अतिरिक्त ठरत आहे, त्यापासून लोणी, पावडर तयार करीत आहोत. त्यासाठी आवश्‍यक सामग्री, निर्मिती खर्च वाढला आहे. त्याचा साठाही वाढू लागला आहे, असेही श्री. लिमये म्हणाले.