कोल्हापुरात खतांची नियमित आवक

कोल्हापूर  : जिल्ह्यात खतांच्या रेक नियमित येत असल्याने या महिनाअखेर पर्यंत युरियासह मुबलक खते शेतकऱ्यांना मिळतील, अशी माहिती पालकमंत्री सतेज पाटील यांनी दिली.

श्री. पाटील म्हणाले, की सध्या शेतीकामांना वेग आला आहे. शेतकऱ्यांकडून विविध खतांची सातत्याने मागणी होत आहे. काही ठिकाणी युरियाची टंचाई होत असल्याच्या तक्रारी आल्या आहेत. परंतु, आवश्यक त्या प्रमाणात रेल्वेने खते कोल्हापुरात येत असून या महिन्यात खते प्रमाणात शेतकऱ्यांना मिळतील.

लॉकडाउनच्या काळात शेतकऱ्यांची खतांची गरज भागविण्यासाठी जिल्हा प्रशासन प्रयत्नशील आहे. सध्या एप्रिल महिन्याची विविध रासायनिक खतांची गरज ही १५ हजार टन असून शासनाकडून जिल्ह्याकरिता १५,९५८ टन खतांचा पुरवठा झाला आहे. सध्या जिल्ह्यात युरिया, डीएपी, संयुक्त व मिश्र खते मिळून सुमारे १६,५६५ टन खते वाटपासाठी उपलब्ध झालेली आहेत. शनिवारी (ता.२५) आयपीएल कंपनीकडून १३२४ टन एमओपी खते उपलब्ध झालेली आहेत. बुधवारअखेर (ता. २९) एकूण ७७९० टन रासायनिक खते जिल्ह्यासाठी प्राप्त होणार आहे. त्यामुळे रासायनिक खाते पुरेशा प्रमाणात उपलब्ध होणार असल्यामुळे टंचाईची परिस्थिती निर्माण होणार नाही.

एखाद्या विशिष्ट कृषी सेवा केंद्रामध्ये खतांचे सर्व ग्रेड प्रकार कदाचित उपलब्ध नसतील, मात्र नजीकच्या दुसऱ्या कृषी केंद्रावर निश्चितपणे खते उपलब्ध आहेत. त्यामुळे कोणताही संभ्रम निर्माण करू नये. असे आवाहन श्री. पाटील यांनी केले.