नगर, पारनेर, नेवासेत कांदा लिलाव बंदच

नगर  ः ‘कोरोना’च्या पार्श्वभूमीवर लॉकडाऊन सुरु झाल्यानंतर बंद करण्यात आलेले नगर जिल्ह्यामधील नगर पारनेर, नेवासेसह बहूतांश बाजार समित्यांमधील कांदा लिलाव अजूनही बंदच आहेत. जेथे लिलाव सुरु आहेत. तेथेही अपेक्षित दर नसल्याने फारशी आवक होत नाही. भाजीपाला, भुसारची आवकही जेमतेमच असल्याची जिल्ह्यातील बाजार समित्यांमधील स्थिती आहे.

जिल्ह्यातील नगर, घोडेगाव (नेवासा), पारनेर, राहाता, राहुरी, कोपरगाव, संगमनेर, कोपरगाव या बाजार समित्यांमध्ये कांद्याचे लिलाव होत असतात. ‘कोरोना’च्या पार्श्वभूमीवर लॉकडाउन सुरु झाल्यानंतर बाजार समित्या बंद करुन कांदा लिलाव थांबवण्यात आले होते. नगर बाजार समितीत सर्वाधिक कांद्याची आवक होत असते. त्यामुळे मध्यंतरी दोन वेळा कांदा लिलाव सुरु करण्याचे प्रयत्न झाले. मात्र गर्दी होत असल्याने हे लिलाव बंद करण्यात आले. सध्या उत्तर भारतात कांद्याला मागणी नसल्याने येथे दर मिळत नाही. व्यापारीही कांदा खरेदी करण्याला धजावत नाहीत.

‘कोरोना’मुळे वाहतुकीलाही अडचणी येत आहेत. त्यामुळे नगर, पारनेर, नेवासेत कांदा लिलाव बंद आहेत. संगमनेर शहरात कोरोनाचे रुग्ण वाढत असल्याने तेथील बाजार समितीत कांद्यासह सर्वच व्यवहार बंद आहेत. राहाता, राहुरी, कोपरगावला लिलाव सुरु आहेत. मात्र कांद्याला दर नसल्याने तेथेही फारशी आवक होत नाही. बहूतांश ठिकाणी शेतकरीही यायला धजावत नाहीत असे नगर बाजार समितीचे सचिव अभय भिसे यांनी सांगितले.

भाजीपाला व भुसारची आवक मात्र सुरु असली तरी पन्नास टक्क्यांच्या जवळपास भुसारच्या आवकेत घट झाली आहे. काही ठिकाणी बाजार समित्यांत सर्व लिलाव सुरु करण्याची मागणी आहे. मात्र गर्दी होणार नाही याबाबत दक्षता घेऊनच बाजार समिती सुरु करण्याबाबत नियोजन सुरु आहे. साधारण ३० मे नंतर ‘कोरोना’बाबत उपाययोजनांचे सर्व नियोजन करुन बाजार समिती सुरु करण्याचा प्रयत्न सुरु आहे, असे पारनेर बाजारसमितीचे सभापती प्रशांत गायकवाड, घोडेगाव बाजार समितीचे सचिव देवदत्त पालवे यांनी सांगितले.