राज्यातील ५० लाख लिटर दुधालाच अनुदानाची गरज : गुलाबराव डेरे

नगर ः राज्यात गाईच्या संकलित होणाऱ्या १ कोटी ३० लाख लिटर दुधापैकी ६० लाख लीटर पिशवीबंद दुधाची दूध संघ विक्री करतात, तर दहा लाख लिटर दुधाचे उपपदार्थ विकतात. हे दर कायम आहेत. परंतु दूध पावडरचे दर पडले म्हणून दूध संघ सरसकट दुधाला कमी दर देत आहेत. मुळात पिशवीबंद दुधाची ४५ ते ५० रुपयांनी विक्री होत असताना संघांना शेतकऱ्यांना ३० रुपये दर देणे अवघड नाही. त्यामुळे दुधाला सरसकट अनुदान मागणे चुकीचे आहे. केवळ पावडर तयार करण्यासाठी लागणाऱ्या ४५ ते ५० लाख लीटर दुधालाच अनुदान देणे गरजेचे आहे, असे मत कल्याणकारी दूध उत्पादक संघाचे नेते गुलाबराव डेरे यांनी मांडले.  

गाईच्या दुधाला दर नसल्याच्या कारणाने आंदोलन पेटू लागले आहे. बहुतांश नेत्यांनी दुधाला प्रतिलिटर अनुदान देण्याची मागणी केली आहे. मात्र राज्यात संकलित होणाऱ्या दुधाला सरसकट अनुदान मागणे चुकीचे आहे, असा मत श्री. डेरे यांनी मांडले. श्री. डेरे दुधप्रश्‍न आणि उपाययोजनेबाबत सविस्तर माहिती सरकारकडे मांडणार आहेत. श्री. डेरे म्हणाले की, कोरोना व्हायरसमुळे दुधाला मागणी नसल्याचे सांगितले जात असले तरी शहरातील दुधाची विक्री आणि दर कमी झालेले नाहीत. गाईच्या संकलित होणाऱ्या एक कोटी तीस लाख लीटर दुधापैकी आजही साठ ते ६२ लाख लीटर दूध ग्राहकांना पिशवीतून विकले जात असून त्याचा दर ४५ ते ५० रुपये लीटर आहे. दहा लाख लिटर दुधाचे उपपदार्थ तयार केले जात असून त्याचेही दर पूर्वीप्रमाणे कायम आहेत. 

‘‘दूध पावडरचे दर पडलेले आहेत असे सांगून सगळ्याच दुधाला कमी दर देत आहेत. मुळात हीच शासन आणि दूध उत्पादकांची फसवणूक आहे. जर ४५ ते ५० रुपयांनी संघ टोण्ड दूध विकत असतील तर शेतकऱ्यांना ३० रुपये दर देणे अवघड नाही. त्यामुळे दुधाला सरसकट अनुदान मागणे चुकीचे आहे. केवळ पावडर तयार करण्यासाठी लागणाऱ्या ४५ ते ५० लाख लीटर दुधालाच अनुदान देणे गरजेचे आहे. सरसकट अनुदान म्हणजेच शेतकऱ्यांचा नव्हे दूध संघाचाच फायदा आहे,’’ असे श्री. डेरे म्हणाले.   रोज लागतील तेरा कोटी  गाईच्या दुधाला प्रतिलिटर दहा रुपये अनुदानाची मागणी केली जात आहे. अनुदान द्यायचे झाल्यास दररोज किमान तेरा कोटी रुपये लागणार आहेत. महिन्याला केवळ अनुदानावर चारशे कोटी रुपये खर्च करावे लागतील. दोन वर्षांपूर्वी असेच अनुदान जाहीर झाले होते. तीन महिने सुद्धा योजना टिकली नाही. अजूनही कित्येक शेतकऱ्यांचे अनुदान मिळालेले नाही. तशीच अवस्था आताही होऊ शकते, असेही श्री. डेरे म्हणाले. 

प्रतिक्रिया दुधाचे दर पडले आणि चारा, पशुखाद्याचे दर वाढले. त्यामुळे दुधाला तीस रुपये दर मिळाला तरच व्यवसाय टिकेल अशी अवस्था आहे. त्यामुळे दीर्घकाळ टिकणारे उपाय करणे गरजेचे आहे. नाही तर महिना-दोन महिन्यात पुन्हा मागचेच दिवस येतील.  - गुलाबराव डेरे, अध्यक्ष, कल्याणकारी दुध उत्पादक संघ, नगर