तीन जिल्ह्यांत तूर विक्रीसाठी २९ हजारांवर शेतकऱ्यांची नोंदणी

नांदेड  ः मराठवाड्यातील नांदेड, परभणी, हिंगोली या तीन जिल्ह्यांमध्ये किमान आधारभूत किंमत योजनेअंतर्गत हमीभावाने (प्रतिक्विंटल ५८०० रुपये) तूर विक्रीसाठी राज्य सहकारी पणन महासंघ आणि विदर्भ सहकारी महासंघाअंतर्गत २३ खरेदी केंद्रांवर शुक्रवार (ता. १४)पर्यंत २९ हजार ६२ शेतकऱ्यांनी आॅनलाइन नोंदणी केली आहे.

परभणी आणि हिंगोली जिल्ह्यांत ५६ शेतकऱ्यांची ५५६ क्विंटल तूर खरेदी करण्यात आली आहे. हमीभावाने तूर खरेदी करण्यासाठी यंदा (२०१९-२०) नाफेडतर्फे राज्य सहकारी पणन महासंघ, विदर्भ सहकारी महासंघ, महाएफपीसी यांच्यामार्फत नोंदणी केली जात आहे.

नांदेड जिल्ह्यात जिल्हा विपणन अधिकारी कार्यालयाअंतर्गत नांदेड, हदगाव, किनवट, मुखेड केंद्रांवर शनिवारपर्यं (ता. १५) ७८१९ शेतकऱ्यांनी तर विदर्भ सहकारी महासंघाच्या भोकर, धर्माबाद, नायगाव येथील केंद्रावर १९९५ शेतकऱ्यांनी आॅनलाइन नोंदणी केली.

राज्य सहकारी पणन महासंघ अंतर्गत जिल्हा विपणन अधिकारी कार्यालयातर्फे परभणी जिल्ह्यातील परभणी, जिंतूर, सेलू, पाथरी, सोनपेठ, पालम, पूर्णा या सात केंद्रांवर एकूण ७ ७३९ शेतकऱ्यांनी आणि हिंगोली जिल्ह्यातील हिंगोली, कन्हेरगाव, कळमनुरी, वसमत, जवळाबाजार, सेनगाव, साखरा येथील केंद्रांवर एकूण ९२२९ शेतकऱ्यांनी आॅनलाइन नोंदणी केली आहे. विदर्भ सहकारी महासंघातर्फे परभणी जिल्ह्यातील मानवत आणि गंगाखेड येथील केंद्रांवर २२७५ शेतकऱ्यांची आॅनलाइन नोंदणी केली आहे.

हदगाव येथे आजपासून खरेदी जिल्हा विपणन अधिकारी कार्यालयाअंतर्गत हिंगोली येथील केंद्रावर शुक्रवारपर्यंत (ता. १४) २७ शेतकऱ्यांची २९३.९० क्विंटल, कळमनुरी येथील केंद्रावर ४ शेतकऱ्यांची ३३ क्विंटल तूर खरेदी करण्यात आली. विदर्भ सहकारी महासंघाच्या मानवत येथील केंद्रांवर २५ शेतकऱ्यांची २३० क्विंटल तूर खरेदी करण्यात आली. नांदेड, किनवट, मुखेड येथे केंद्रे सुरू करण्यात आली आहेत. सोमवारी (ता. १७) हदगाव येथे केंद्र सुरू होईल. नांदेड जिल्ह्यात शुक्रवारपर्यंत (ता. १४) तूर खरेदी झाली नव्हती. परभणी, पालम, पूर्णा येथे, हिंगोली जिल्ह्यांत वसमत, सेनगाव या ठिकाणी तूर खरेदी केंद्रे सुरू करण्यात आली आहेत, असे सूत्रांनी सांगितले.