नगर जिल्ह्यात ७१ हजार ६६५ क्विंटल तूर खरेदी

नगर  ः नगर जिल्ह्यात नाफेडने सुरु केलेल्या १२ शासकीय खरेदी केंद्रांवर आतापर्यंत ७१ हजार ६६५ क्विंटल तूर खरेदी झाली आहे. त्यात सर्वाधिक खरेदी शेवगाव, कर्जत केंद्रांवर झाली आहे. तूर विक्रीसाठी नोंदणीची मुदत संपलेली असली तरी खरेदीसाठी १५ जूनपर्यंत मुदत वाढवण्यात आली असल्याची माहिती जिल्हा मार्केटिंग फेडरेशनच्या कार्यालयातून देण्यात आली.

नगर जिल्ह्यात हमीभावाने तूर, हरभरा खरेदी करण्यासाठी बारा ठिकाणी खरेदी केंद्रे सुरु आहेत. आतापर्यंत १६ हजार ५९४ शेतकऱ्यांनी तूर विक्रीसाठी आॅनलाईन नोंदणी केलेली आहे. त्यापैकी ११ हजार ५९३ शेतकऱ्यांकडून ७१ हजार ६६५ क्विंटल तूर खरेदी झालेली आहे. अजून पाच हजार शेतकऱ्यांना तूर विक्रीची प्रतिक्षा असून ‘कोरोना’च्या पार्श्वभूमीवर तूर खरेदीला फारसा वेग नसला तरी तूर विक्री करायची राहिलेल्या पाच हजार शेतकऱ्यांना संदेश देण्यात आले आहेत.

मात्र त्यातील बहूतांश शेतकऱ्यांनी बाजारात तूर विक्री केली असल्याचा अंदाज व्यक्त केला जात आहे. तर खरेदीसाठी ३० मे ची मुदत दिली होती. त्यात आता वाढ करुन १५ जून करण्यात आली आहे. तूर खरेदी केलेल्या तीस टक्के शेतकऱ्यांचे पैसे अजून अडकले असल्याचे सांगितले जात आहे. यंदा आतापर्यंत खरेदी शेवगाव, कर्जत केंद्रावर सर्वाधिक तूर खरेदी झाली आहे.   केंद्रनिहाय तूर खरेदी (क्विंटल) ः राहुरी ः १०१०, शेवगाव ः १९७७३, मिरजगाव ः २०३२, पाथर्डी ः ९३२२, पारनेर ः ४०७८, नगर ः ४८१३, कर्जत ः ११०६०, खर्डा ः ४६२८, नेवासा ः २१०४, श्रीगोंदा ः ६७३, जामखेड ः ६७५३, टाकळी खंडेश्वरी ः ९०२५