जळगाव जिल्ह्यात रासायनिक खतांचा पुरवठा वेगात

जळगाव   ः जिल्ह्यात २०२०-२१ मधील खरिपासाठी रासायनिक खतांचा पुरवठा वेगात सुरू आहे. खतांचा पुरवठा सुरळीत करून घेत त्याची आपापल्या गोदामांमध्ये व इतर भागात साठवणूक करून घ्यावी. ऐनवेळी कुठलीही टंचाई जाणवायला नको, अशा सूचना वरिष्ठ कार्यालयाने कंपन्या, पुरवठादारांना दिल्याची माहिती सूत्रांनी दिली आहे.

जिल्ह्यात खरिपासाठी तीन लाख २० हजार मेट्रिक टन विविध रासायनिक खतांचा कंपन्यांतर्फे पुरवठा होणार आहे. यातील ९५ ते ९८ टक्के खतांचा पुरवठा रेल्वे रॅकच्या माध्यमातून होईल. रेल्वेची मालवाहतूक व्यवस्था सुरू असल्याने हा खतपुरवठा बऱ्यापैकी झाला आहे. या महिन्याच्या सुरवातीलाच युरियाचे दोन रॅक दाखल झाले. याद्वारे ५५७३ मेट्रिक टन युरियाचा खरिपासाठी पुरवठा झाला आहे. संयुक्त खतांचे रॅकही दाखल झाले असून, पुढील आठवड्यात हा पुरवठा आणखी गतीने होणार आहे. जिल्ह्यात युरियाची अधिक गरज असते.

यामुळे युरियाचा पुरवठा पुरेसा करून घेण्यासाठी कृषी यंत्रणांचे लक्ष आहे. यासंदर्भात पुरवठादार कंपन्यांशी सातत्याने पत्रव्यवहारदेखील झाल्याची माहिती आहे. शुक्रवारपर्यंत (ता.२४) जिल्ह्यात येत्या खरिपासाठी आठ हजार ९६ टन सुपर फॉस्फेट, ३७७४ टन पोटॅश, डीएपीचा ९४६ टन, अमोनिअम सल्फेटचा ३४९ टन, २०.२०.०० चा ८४४ टन पुरवठा झाला आहे.