नाॅन एफएक्यू कापसाचे करायचे काय : शेतकऱ्यांपुढे प्रश्न

अकोला  ः शासनाकडून कापूस खरेदी प्रक्रिया टप्प्याटप्याने सुरु होत असल्याने दिलासा मिळाला असतानाच या केंद्रांवर केवळ एफएक्यू दर्जाचाच कापूस खरेदी होत असल्याने उर्वरित कापसाचे काय करावे, असा प्रश्न शेतकऱ्यांना पडला आहे. केंद्रांवर गेलेल्या वाहनात एफएक्यू दर्जाचा जितका कापूस असेल  तेवढा घेऊन उर्वरित कापूस परत केला जात असल्याने संताप वाढू लागला आहे. विशेष म्हणजे सध्या खासगी कापूस खरेदी ठप्प असल्याने अधिकच त्रास वाढलेला आहे.

मार्चमध्ये लाॅकडाउन सुरु झाल्यानंतर कापूस खरेदी बंद करण्यात आली होती. या आठवड्यात टप्प्याटप्याने ही खरेदी सुरु केली जात आहे. शुक्रवारी (ता. २४) हिवरखेड येथे येथे कापूस खरेदी केंद्रावर गेलेल्या शेतकऱ्यांचे वाहन परत करण्यात आले. शेतकऱ्याने कारण विचारले तर ग्रेडरने दोन ओळीचे पत्र  हातात लिहून दिले.  ५५ क्विंटल कापूस घेऊन गेलेल्या शेतकऱ्याला वाहनाची भाडेपट्टी, हमाली, दिवसभर घेतलेल्या मेहनतीनंतर कापूस परत केल्याने मोठा मनस्ताप सहन करावा लागला.

यंदा कापसाच्या दर्जाला बसला फटका आॅक्टोबर- नोव्हेंबर महिन्यात वेचणीला आलेला कापूस परतीच्या पावसामुळे ओला झाला होता.  बीटी कपाशीचे संपूर्ण क्षेत्र असल्याने याकाळात वेचणीला येणाऱ्या कापसाचे प्रमाण अधिक असते. यंदा उत्पादित झालेल्या एकूण कापसापैकी पहिल्या दोन ते तीन वेचण्या सोडल्या तर उर्वरित सर्वच कापूस एफएक्यू दर्जाचा नाही. अशा स्थितीत लाखो क्विंटल कापसाचे करायचे काय असा पेच निर्माण झाला आहे. शासकीय खरेदी केंद्रांवर हा कापूस स्विकारला जात नाही. बाजारपेठेत व्यापारी चार ते साडेचार हजार रुपयांप्रमाणे हा कापूस मागतात. शासकीय दर व व्यापाऱ्यांच्या दरात ६०० ते ७५० रुपये प्रतिक्विंटलपर्यंत तफावत आहे. शिवाय या खरेदीचे चुकारे कुठे १५ दिवस तर कुठे महिनाभराने दिले जातील, असे व्यापारी आधीच स्पष्ट करीत आहेत, असे शेतकऱ्यांनी सांगितले.

शेतकरी प्रतिक्रिया कापूस घेऊन मी खरेदी केंद्रावर गेलो होतो. तेथे ग्रेडरने कापूस पाहिला व नाॅन एफएक्यू असल्याचे सांगत नाकारला.  त्यांनी लेखी लिहून दिले. मला  घरून गाडी भरून नेणे, वाहतुक खर्च व मजुरी असा जवळपास पाच हजार रुपये खर्च आला होता. तो वाया गेला. आम्ही शेतकरी पणनमंत्री बाळासाहेब पाटील यांच्याशी बोललो. त्यांनी शेतकऱ्यांचा कापूस घेऊ व संबंधितांना योग्य आदेश देऊ एवढेच सांगितले.  शासनाने तातडीने तोडगा काढत सरसकट खरेदी केली तरच कापूस उत्पादक शेतकरी तरेल. अन्यथा संकट वाढणार आहे. - श्यामशील भोपळे, शेतकरी, हिवरखेड, जि. अकोला.