पुणे  : जिल्हा परिषदेकडून वैयक्तिक लाभ योजनेंतर्गत लाभार्थ्यांना वस्तू खरेदीसाठी दिलेली मुदत संपत आली आहे. त्यामुळे लाभार्थ्यांनी तत्काळ वस्तू खरेदी करून बिले संबंधित पंचायत समित्यांमध्ये सादर करावीत, वेळेत बिले सादर झाली तर अनुदान मिळेल, असे आवाहन जिल्हा परिषद प्रशासनाकडून करण्यात आले. 

जिल्हा परिषदेच्या कृषी व पशुसंवर्धन, समाजकल्याण तसेच महिला व बालकल्याण विभागाकडून वैयक्‍तिक लाभाच्या योजनेसाठी अर्ज मागविले असता, शेतकरी आणि महिलांकडून उत्स्फूर्त प्रतिसाद मिळाला. कृषी विभागाकडून वैयक्तिक लाभ योजनेतून यावर्षी एकूण तेरा अवजारे दिली जाणार आहेत. यामध्ये मोटार पंपसंच, डिझेल इंजिन पंपसंच, पीव्हीसी पाइप, बॅटरी ऑपरेटेड नॅपसॅक स्प्रेपंप, स्प्रेपंप ऑइल इंजिनसह प्लॅस्टिक क्रेटस, प्लॅस्टिक ताडपत्री, सरी रिजर ट्रॅक्‍टरचलित, इलेक्‍ट्रॉनिक कडबाकुट्टी यंत्र मोटारसह या वस्तूंचा समावेश आहे. 

या योजनेतून लाभार्थ्यांची अंतिम यादी तयार करून पंचायत समित्यांना पाठविली आहे. लाभार्थ्यांना वस्तू खरेदी करण्याच्या सूचना दिल्या आहेत. त्यानुसार लाभार्थ्यांनी दिलेल्या मुदतीत वस्तू खरेदी करून पुढील प्रक्रिया पूर्ण करावी. याद्या प्रसिद्ध केल्यापासून लाभार्थ्यांना वस्तू खरेदी करण्यासाठी पुढे २१ दिवसांची मुदत दिली आहे. त्यातील काही विभागाची मुदत संपली असून, ज्यांनी वेळेत वस्तूंची खरेदी केली नाही, त्या ऐवजी आता प्रतीक्षा यादीतील लाभार्थ्यांना संधी देण्यात आली आहे. या लाभार्थ्यांनाही वेळेत खरेदी करण्याच्या सूचना दिल्या आहेत. वस्तू खरेदी पूर्ण झाल्यानंतर थेट लाभ हस्तांतरण पद्धतीने लाभार्थ्यांच्या बॅंक खात्यावर अनुदान जमा होणार आहे.