सुरक्षित प्रवासासाठी प्रवाशांना सुविधा देणार: मंत्री अनिल परब

नाशिक : प्रवाशांना अधिकाधिक सुविधा देऊन त्यांचा प्रवास सुरक्षित करण्यासाठी सर्वतोपरी प्रयत्न करण्यात येणार असल्याचे प्रतिपादन परिवहनमंत्री ॲड. अनिल परब यांनी केले.

त्र्यंबकेश्वर येथील बसस्थानकाच्या आधुनिकीकरणाचा भूमिपूजन सोहळा नुकताच झाला. या वेळी मंत्री परब बोलत होते. या वेळी खासदार हेमंत गोडसे, आमदार नरेंद्र दराडे, हिरामण खोसकर, नगराध्यक्ष पुरुषोत्तम लोहगावकर, सभापती मोतीराम दिवे, तहसीलदार दीपक गिरासे, एसटी महामंडळाचे मनोहर पांचाळ, नितीन मैंद आदी उपस्थित होते.

मंत्री परब म्हणाले, की त्र्यंबकेश्वर हे बारा ज्योतिर्लिंगांपैकी एक असल्याने येथे येणाऱ्या भाविकांची संख्या अधिक आहे. या दृष्टिकोनातून एसटी बसेसच्या सुविधा पुरविण्यावर भर देण्यात येईल. शाळा सुटण्याची व भरण्याच्या वेळेनुसार बससेवा उपलब्ध करून देण्यासाठी प्रयत्न करण्यात येतील. तसेच महाराष्ट्रातील सर्व पाच ज्योतिर्लिंगांना जोडणारी बस सेवा सुरू करण्यात येणार असल्याचेही त्यांनी सांगितले.