सिंधुदुर्ग जिल्ह्यात पाच जणांचा मृत्यू; मात्र ‘कोरोना’ शी संबंध नाही : जिल्हाधिकारी

सिंधुदुर्ग  ः येथील जिल्हा रूग्णालयातील आयसोलेशन कक्षात उपचार घेत असलेल्या चार जणांचा ४८ तासांत मृत्यू झाला. याशिवाय होम क्वारंटाइन केलेल्या एका महिलेचा देखील मृत्यू झाला आहे. मात्र त्यांच्या मृत्युचा ‘कोरोना’शी सबंध नाही. मात्र, त्यांचे नमुने तपासणीकरीता पाठविण्यात आले असून, त्यातील तीन नमुने निगेटिव्ह आले आहेत. उर्वरित दोन जणांच्या नमुन्याचा अहवाल येणे बाकी आहे, अशी माहिती जिल्हाधिकारी के.मंजुलक्ष्मी यांनी दिली.

सिंधुदुर्ग जिल्ह्यात ‘कोरोना’चा एक रूग्ण सापडला होता. उपचाराअंती या रूग्णाचे तीनही अहवाल निगेटिव्ह आले होते. त्यामुळे जिल्ह्यात सध्या एकही कोरोनाबाधित रूग्ण नाही. परंतू, खबरदारी म्हणून जिल्हा प्रशासन सर्व उपाययोजना काटेकोरपणे राबवित आहे. जिल्हा रूग्णालयात आयसोलेशन कक्षातील चौघांचा दोन दिवसांत मृत्यू झाला तर क्वारंटाइन केलेल्या एका महिलेचा मृत्यू झाला. त्यांच्या मृत्युशी ‘कोरोना’चा सबंध नाही. तरीदेखील त्यांचे नमुने तपासणीकरीता मिरजला पाठविण्यात आले आहेत. त्यातील तिघांचे अहवाल प्राप्त झाले असून, ते निगेटिव्ह आले आहेत.

उर्वरित दोघांचा अहवाल यायचा आहे. मृत झालेल्या पाच पैकी तीन व्यक्ती वयस्कर होत्या. त्यांना अन्य आजार होते. त्यामुळे त्यांचा मृत्यु झाला तर एक तरूण आणि एक तरूणीला दुर्धर आजाराने ग्रासले होते. त्यातुन त्यांचा मृत्यू झाला आहे. त्यांच्यामध्ये कोणतीही ‘कोरोना’ची लक्षणे नव्हती. तरीही खात्रीसाठी नमुने पाठविण्यात आले होते, असे जिल्हाधिकाऱ्यांनी सांगितले.

आयसोलेशन कक्षात आणखी दोन रूग्ण दाखल झाले आहेत. सध्या या कक्षात ६२ रूग्ण दाखल आहेत. नव्याने २० रूग्णांचे नमुने मिरजला तपासणीकरीता पाठविण्यात आले आहेत. आतापर्यत २२८ व्यक्तींचे नमुने पाठविण्यात आले आहेत. त्यापैकी १९७ नमुन्यांचा अहवाल प्राप्त झाला आहे. होम क्वारंटाइन केलेल्या १९२ व्यक्तींना घरी सोडण्यात आले आहे. संस्थात्मक क्वारंटाईनमध्ये नव्याने सात व्यक्तींना दाखल केले असल्याचे जिल्हाधिकाऱ्यांनी सांगितले.