कृषी निविष्ठांच्या सुरक्षित वितरणासाठी समन्वय समिती स्थापन करा ः आमदार सुलभा खोडके

अमरावती  ः खरीप हंगामाची लगबग सुरु झाली आहे. त्या पार्श्‍वभूमीवर कृषी सेवा केंद्रांवर निविष्ठा खरेदीसाठी गर्दी होईल. ही बाब लक्षात घेत ‘कोरोना’च्या पार्श्वभूमीवर सुरक्षित निविष्ठा वितरणासाठी जिल्हास्तरावर समन्वय समिती स्थापन करावी, अशी सुचना आमदार सुलभा खोडके यांनी केली आहे. 

जिल्ह्यातील शेतकरी खरिपाच्या तयारीला लागले आहेत. जिल्ह्यात जवळपास ७ लाख २८ हजार ११२ हेक्‍टर क्षेत्रावर खरिपाची पेरणी होते. कापूस, सोयाबीन, ज्वारी, उडीद, मका आदी पिके जिल्ह्यात घेतली जातात. हंगामाकरिता ८६,२३५ क्‍विंटल बियाणे महाबीजकडून उपलब्ध होणार आहे. जिल्ह्यात सोयाबीन बियाण्याची मागणी १ लाख ३० हजार क्‍विंटल आहे. संकरीत कापसाच्या ५,८५०, तुरीच्या ५,२८० क्‍विंटल बियाण्यांची मागणी आहे. १ लाख ३८ हजार टन खतांची मागणी आहे. त्यातील १,०१,८३० टन खत पुरवठ्याला मंजूरी मिळाली आहे. रब्बीमधील १६,८२४ टन खतसाठा शिल्लक आहे. एकंदरीत कृषी निविष्ठांची मुबलकता असल्याची स्थिती आहे.

सध्या कृषी सेवा केंद्रांवरुन बियाणे तसेच इतर निविष्ठांची उचल अत्यल्प आहे. खरीप जवळ येताच शेतकरी निविष्ठा खरेदीकरिता एकाचवेळी गर्दी करतील. परिणामी कोरोना नियंत्रणासाठीच्या प्रतिबंधात्मक उपायांकडे दुर्लक्ष होण्याची शक्‍यता आहे. त्यासोबतच पीककर्ज विषयक तक्रारींमध्ये देखील वाढ होणार आहे. हे लक्षात घेता या समस्या सोडविण्यासाठी प्रशासनने जिल्हास्तरावर समन्वय समितीचे गठण करावे, अशी सुचना आमदार खोडके यांनी केल्या आहे.   

जिल्हास्तरीय समन्वय समिती  निवासी उपजिल्हाधिकारी यांच्या अध्यक्षतेखाली असणाऱ्या या समितीत जिल्हा अधिक्षक कृषी अधिकारी, जिल्हा उपनिबंधक, कृषी विकास अधिकारी यांचा समावेश करावा. निवासी उपजिल्हाधिकाऱ्यांच्या अधिनस्त एका तहसीलदारांची नेमणूक करुन तालुका व जिल्हास्तरीय समन्वय समितीमध्ये ताळमेळ बसवावा, अशीही आमदार खोडके यांची मागणी आहे.