सोलापुरात तीन ठिकाणी थेट शेतीमाल विक्री केंद्रे

सोलापूर  ः ‘कोरोना’च्या पार्श्वभूमीवर सोलापूर बाजार समितीतील व्यवहार काहीसे विस्कळीत झाले आहेत. त्यामुळे शेतकऱ्यांची अडचण झाली आहेच, पण ग्राहकांवरही भटकंतीची वेळ आली झाली आहे. यावर मात करण्यासाठी कृषी विभागाने मार्ग काढला असून, उत्तर सोलापूर आणि दक्षिण सोलापूर तालुक्यातील शेतकरी गट आणि शेतकरी कंपन्यांच्या माध्यमातून सोलापूर शहरातील तीन ठिकाणी भाजीपाला विक्रीची व्यवस्था करून दिली आहे. जिल्हा प्रशासनाने ठरवून दिलेल्या वेळेत या तीन ठिकाणी भाजीपाला ग्राहकांना मिळणार आहे.

लॅाकडाउनमध्ये गर्दी टाळण्यासाठी केलेल्या नियमावलीमुळे सोलापूर बाजार समितीतील लिलाव बंद आहेत. जेमतेम भागात आणि काही मोजक्याच प्रमाणात भाजीपाल्याचे लिलाव होतात. पण शहराची मागणी आणि शेतकऱ्यांकडून होणाऱ्या शेतीमालाच्या आवकेचा विचार करता याचा मेळ बसत नसल्याने अडचण झाली होती. त्यावर कृषी विभागाने पुढाकार घेत शेतकरी गट आणि शेतकरी कंपन्यांना आवाहन केले. त्यानुसार जिल्हा प्रशासनाकडे परवानगी मिळवून अंत्रोळीकरनगर, कर्णिक नगर आणि उपप्रादेशिक परिवहन विभागाशेजारील जागेत आठवड्यातून एकदा हा बाजार भरवला जाणार आहे. प्रामुख्याने या सर्व ठिकाणी विक्रीसाठी शेतकरी गट, शेतकरी कंपन्या आणि शेतकऱ्यांनाच परवानगी दिली जाणार आहे.