थेट भाजीपाला विक्रीसाठी कन्हान शेतकरी कंपनीचा पुढाकार

नागपूर  ः अडचणी देखील कधीकधी व्यावसायिक संधी निर्माण करतात हा विश्‍वास रुजविण्यात कन्हान ॲग्रोव्हिजन शेतकरी उत्पादक कंपनी यशस्वी ठरली आहे. कंपनीने लॉकडाउनमुळे निर्माण झालेल्या समस्यांवर मात करीत कंपनीच्या सभासदांसाठी थेट भाजीपाला विक्रीचा पर्याय उपलब्ध करुन देत त्यांची आर्थिक घडी सावरण्यासाठी पुढाकार घेतला.

कन्हान येथील नोंदणी असलेल्या कन्हान ॲग्रोव्हिजन शेतकरी उत्पादक कंपनीचे १५० सभासद आहेत. राईस मिल त्यासोबतच शेतीमाल क्‍लिनिंग, ग्रेडींग प्रकल्प उभारणीचे काम कंपनीने हाती घेतले आहे. परंतू सध्या लॉकडाउनमुळे हे काम थांबले. परंतू कंपनीचे व्यवहार थांबू नये तसेच अडचणीच्या काळात शेतकऱ्यांच्या हातात चार पैसे पडावेत याकरिता कंपनीचे अध्यक्ष कमलेश भोयर यांनी थेट भाजीपाला विक्रीचा पर्याय निवडला. जिल्हा अधिक्षक कृषी अधिकारी मिलिंद शेंडे, मिलिंद राठोड यांच्या माध्यमातून नागपूरातील लक्ष्मीनगर, धरमपेठ झोनमध्ये भाजीपाला विक्रीची परवानगी त्यांनी मिळविली.

सालवा, ऐसंबा, निलज या गावातील शेतकऱ्यांकडून भाजीपाला घेऊन त्याची विक्री सुरु केली. आता भाजीपाला विक्रीनंतर दुसऱ्या दिवशी भाजीपाला उत्पादकांना त्यांचे पैसे दिले जातात. वांगी, टोमॅटो, भेंडी, पालक, मेथी, चवळी, मिरचीची विक्री या कंपनीच्या माध्यमातून होते. यातून रोज सुमारे १५ हजार रुपये मिळतात. १५०० रुपये प्रतीगाडी भाडेपट्टी व उर्वरित नफा विक्रीसाठी येणाऱ्या तीन शेतकऱ्यांमध्ये विभागला जातो. खरीप हंगाम तोंडावर असल्याने त्याकरिता लागणाऱ्या पैशाची सोय करण्यासाठी थेट भाजीपाला विक्रीचा पर्याय आमच्यासाठी पूरक ठरला, असे कमलेश भोयर यांनी सांगितले.