आटपाडी तालुक्यातील शेतकरी कर्जाच्या प्रतिक्षेत

आटपाडी, जि. सांगली  ः आटपाडी तालुक्‍यातील महात्मा जोतिराव फुले कर्जमुक्ती योजनेत जिल्हा आणि राष्ट्रीयिकृत बॅंकेतील ४०७१ शेतकरी कर्जमाफीसाठी पात्र ठरले होते. त्यांचे कर्ज कर्ज खात्याला जमा करून त्यांना कर्जमुक्त करण्यात आले आहे. मात्र त्यांना जिल्हा बॅंकेसह राष्ट्रीयिकृत बॅंकांनी खरीप हंगामासाठी अद्याप कर्ज पुरवठा केलेला नाही. कर्जमाफीतील पात्र शेतकरी नवीन कर्जाच्या प्रतिक्षेत आहेत.

महाविकास आघाडी सरकारने सत्तेवर आल्यानंतर राज्यातील पीक कर्ज थकबाकीदार शेतकऱ्यांसाठी अटी घालून महात्मा जोतिराव फुले कर्जमुक्ती जाहीर केली. या योजनेसाठी तालुक्‍यातील ४६०० प्रकरणे दाखल होती. त्यातील ४२५१ प्रकरणांचे प्रमाणिकरण झाले होते. विविध अटी आणि शर्तींची पडताळणी करून ४०७१ शेतकऱ्यांना २७ कोटी ११ लाखांची कर्जमाफी मिळाली. दरम्यान, पात्र ठरलेल्या शेतकऱ्यांपैकी जिल्हा मध्यवर्ती बॅंकेतील ३२०० शेतकऱ्यांच्या कर्ज खात्यावर एकोणीस कोटींवर रक्कम जमा झाली आहे. राष्ट्रीयिकृत बॅंकेशी संबंधित ५२६ शेतकऱ्यांना चार कोटी ११ लाख रुपये मिळाले आहेत. तालुक्‍यातील ३७०० शेतकऱ्यांच्या कर्जखात्यांवर २४ कोटीं दरम्यान रक्कम जमा झाली आहे. राज्य सरकारने कर्जमाफी देताना संबंधित शेतकऱ्यांना खरीप हंगामाच्या पूर्वतयारीसाठी नव्याने पीककर्ज द्यावे, असे स्पष्ट आदेश दिलेत प्रत्यक्षात बॅंकांनी याची अंमलबजावणी केलेली नाही. सोसायट्यांकडून अंमलबजावणी नाहीच जिल्हा बॅंकेने २७ मार्चला कर्जमाफीतील शेतकऱ्यांना नवीन कर्ज वाटपाचे बॅंका आणि सेवा सोसायटयांना लेखी आदेश दिले. संबंधित शेतकऱ्यांचे पीक पाणी पाहून १०० टक्के पीक कर्ज, अल्प आणि मध्यम मुदत आणि कंझम्शन कर्ज वाटप करावे. संबंधित शेतकऱ्यांच्या कुटुंबातील इतर थकबाकीदार नसावे तसेच ज्या शेतकऱ्यांचा इकरार कमी असल्यास पीक पाहून तो दुप्पट करून वाढीव कर्ज द्यावे असे स्पष्ट आदेश दिले आहेत मात्र सोसायटयांनी याची अंमलबजावणी केलेली नाही.