नागपूरमध्ये शेतकरी आणि कृषी विभागात गुगल लिंक ठरतेय दुवा

नागपूर   ः ‘कोरोना’च्या पार्श्नभूमीवर सुरु असलेल्या लॉकडाउनच्या काळात शेतीविषयक कामांवर परिणाम होऊ नये याकरिता कृषी विभागाकडून गुगल लिंकच्या माध्यमातून शेतकऱ्यांच्या गरजा जाणून घेण्याचा प्रयत्न केला जात आहे. त्यामाध्यमातून आजवर सुमारे २६०० शेतकऱ्यांनी गुगल लिंकवर फळबाग लागवडीसह यांत्रिकीकरणाकरिता उत्साही असल्याचे कळविले आहे. लॉकडाउन संपताच या शेतकऱ्यांशी संपर्क साधत पुढील प्रक्रिया पूर्ण करुन घेत त्यांना योजनांचा लाभ दिला जाणार असल्याची माहिती कृषी विभागाच्या सूत्रांनी दिली.

लॉकडाउनमुळे शेतकऱ्यांना हंगामात मिळणाऱ्या योजनांच्या लाभापासून वंचित राहण्याची वेळ आली आहे. फळबाग त्यासोबतच यांत्रिकीकरणाच्या योजनांचा त्यामध्ये समावेश आहे. ही अडचण लक्षात घेत नागपूर जिल्हा कृषी विभागाने गुगल लिंकच्या माध्यमातून प्रस्तावाची प्रक्रिया सुरु केली आहे. २६०० शेतकऱ्यांचा याला प्रतिसाद मिळाला असून त्याची वर्गवारी करीत योजनांचा लाभ संबंधित शेतकऱ्यांना दिला जाणार आहे.