पावसामुळे सिंधुदुर्गात आंबा, काजू नुकसानीची शक्यता 

सिंधुदुर्ग  ः जिल्ह्यात बुधवारी (ता.२५) रात्री काही ठिकाणी विजांच्या कडकडाटासह पाऊस झाला. सह्याद्री पट्टयातील गावांमध्ये पावसाचा जोर अधिक होता. पावसामुळे अगोदरच ‘कोरोना’मुळे संकटांत सापडलेल्या आंबा, काजूचे नुकसान होण्याची शक्यता शेतकऱ्यांनी वर्तवली आहे.   

जिल्ह्यात गेले दोन दिवस ढगाळ वातावरण होते. उष्मा देखील वाढला होता. बुधवारी दुपारनंतर पुन्हा ढगाळ वातावरण निर्माण झाले. वाऱ्याचा वेग देखील वाढला होता. सायकांळी उशीरा विजांचा कडकडाट सुरू झाला. त्यानंतर रात्री साडेआठ वाजण्याच्या सुमारास रिमझिम पावसाला सुरूवात झाली.

सह्याद्री पट्टयात पावसाचा जोर अधिक होता. वैभववाडी तालुक्यातील करूळ, नावळे, सडुरे-शिराळे, कुर्ली, खांबाळे या भागात चांगला तर इतर तालुक्यात रिमझिम पाऊस झाला. कणकवली तालुक्यातील फोंडाघाट, घोणसरी, हरकुळे या भागात पाऊस झाला. याशिवाय देवगड, कुडाळ या तालुक्यांमध्ये पाऊस बरसला. अगोदरच ‘कोरोना’मुळे अडचणीत असलेल्या आंबा,काजूचे आता पावसामुळे नुकसान होणार आहे. त्यामुळे बागायतदारांमध्ये चिंतेचे वातावरण आहे.