राज्यात उष्ण, कोरड्या हवामानाचा अंदाज 

पुणे : राज्याच्या विविध भागांत पडत असलेला पूर्वमोसमी पाऊस आता थांबला आहे. आजपासून राज्यात मुख्यत: उष्ण व कोरड्या हवामानाचा अंदाज आहे. तर विदर्भात तुरळक ठिकाणी हलक्या स्वरूपाचा पाऊस पडण्याची शक्यता हवामान विभागाने वर्तविली आहे. उर्वरित राज्यात उन्हाचा चटका वाढणार आहे. बुधवारी (ता.२२) सकाळपर्यंतच्या २४ तासांमध्ये नांदेड येथे देशातील उच्चांकी ४२.५ अंश सेल्सिअस तापमानाची नोंद झाली.  पूर्वमोसमी पावसाचे ढग, वाहणारे वारे यामुळे उन्हाचा चटका कमी अधिक होत आहे.

बुधवारी (ता.२२) मध्य महाराष्ट्रातील जळगाव, धुळे, मालेगाव, सोलापूर, मराठवाड्यातील नांदेडसह परभणी विदर्भातील अकोला, अमरावती, ब्रह्मपुरी, चंद्रपूर, गोंदिया, नागपूर, वाशीम, वर्धा येथे तापमानाचा पारा चाळिशीपुढे गेला आहे. वाशीम, वर्धा येथेही तापमान ४२ अंशांपेक्षा अधिक आहे. पावसाची उघडीप, निरभ्र आकाश यामुळे उन्हाचा ताप वाढणार आहे. आज (ता. २३) विदर्भातील नागपूर, भंडारा, चंद्रपूर, गोंदिया, गडचिरोली जिल्ह्यात तुरळक ठिकाणी हलक्या पावसाची शक्यता हवामान विभागाने वर्तविली आहे. 

बुधवारी (ता. २२) सकाळपर्यंतच्या २४ तासांमध्ये राज्यातील विविध ठिकाणांचे कमाल तापमान (अंश सेल्सिअसमध्ये) : पुणे ३८.१, जळगाव ४१.०, धुळे ४१.२, कोल्हापूर ३४.९, महाबळेश्‍वर ३१.६, मालेगाव ४१.६, नाशिक ३७.१, निफाड ३७.०, सांगली ३७.९, सातारा ३८.४, सोलापूर ४०.५, डहाणू ३५.५, सांताक्रूझ ३४.३, रत्नागिरी ३४.०, औरंगाबाद ३९.०, परभणी ४१.८, नांदेड ४२.५, अकोला ४१.८, अमरावती ४०.६, बुलडाणा ३९.५, ब्रह्मपुरी ४१.०, चंद्रपूर ४०.५, गोंदिया ४०.२, नागपूर ४१.९, वाशीम ४२.०, वर्धा ४२.०.