पुढच्या हंगामातील अंदाजाबाबत सरकारची सावधगिरी

यंदाच्या साखर हंगामातील विक्रमी साखर उत्पादनामुळे २०२२-२०२३ च्या हंगामातील साखर उत्पादनाबाबतही केंद्र सरकार आशावादी आहे. मात्र तरीही सरकारकडून सावध भूमिका घेतली जात आहे.

साखर आयुक्तालयांनी दिलेली माहिती आणि साखर उद्योग क्षेत्रातील संघटनांनी वर्तवलेल्या विक्रमी अंदाजानंतरही केंद्र सरकारकडून पुढच्या हंगामातील साखर उत्पादनाबाबत सावध भूमिका घेतली जात आहे. प्रमुख साखर उत्पादक राज्यांसोबतची बैठक पार पडूनही सरकारने पुढच्या हंगामातील साखर उत्पादनाचा प्राथमिक अंदाज सार्वजनिक केलेला नाही.

या हंगामाप्रमाणेच पुढच्या साखर हंगामातही साखरेचे वाढीव उत्पादन होईल, या गृहीतकाच्या आधारे साखर उद्योग क्षेत्राने सरकारकडे केलेल्या १ दशलक्ष टन अतिरिक्त साखरेच्या निर्यातीची मागणी सरकारने मान्य केली नाही.

बुधवारी (१५ जून) केंद्र सरकारसोबत झालेल्या बैठकीतही साखर उद्योगाने सरकार अतिरिक्त साखर निर्यातीला परवानगी कधी देणार? या मागणीबाबत विचारणा केली. केंद्रीय अन्न मंत्रालयाच्या अधिकाऱ्यांनी त्यावर भाष्य करण्यास नकार दिला.