विधीमंडळाचे हिवाळी अधिवेशन सहा दिवस चालणार

मुंबई : राज्य विधिमंडळाचे हिवाळी अधिवेशन येत्या सोमवारपासून (ता. १६) नागपुरात सुरू होणार आहे. या अधिवेशनाचे कामकाज शनिवारपर्यंत (ता. २१) चालणार आहे. 

विधिमंडळ कामकाज सल्लागार समितीची बैठक मंगळवारी (ता. १०) पार पडली. या वेळी अधिवेशनातील कामकाज निश्चित करण्यात आले. बैठकीला विधानसभा अध्यक्ष नाना पटोले, विधान परिषद सभापती रामराजे नाईक निंबाळकर, मुख्यमंत्री उद्धव ठाकरे आदींसह इतर मंत्री उपस्थित होते.  

मुख्यमंत्री उद्धव ठाकरे सरकारचे हे पहिलेच हिवाळी अधिवेशन आहे. एकूण सहा दिवस अधिवेशनाचे कामकाज चालणार आहे. पहिल्या दिवशी (सोमवारी) अध्यादेश सभागृहाच्या पटलावर ठेवण्यात येतील, त्यासोबतच पुरवणी मागण्या विधिमंडळात मांडण्यात येणार आहेत. दुसऱ्या (मंगळवारी) आणि तिसऱ्या दिवशी (बुधवारी) राज्यपालांच्या अभिभाषणावर चर्चा केली जाईल. चौथ्या (गुरुवारी) आणि पाचव्या दिवशी (शुक्रवारी) पुरवणी मागण्यांवर चर्चा केली जाणार आहे. तसेच पाचव्या दिवशी पुरवणी विनियोजन विधेयक मांडले जाईल. सहाव्या दिवशी (शनिवारी) अशासकीय कामकाजानंतर अधिवेशनाची सांगता होणार आहे.