मंत्रिमंडळाचा उद्या विस्तार

मुंबई : राज्यातील ठाकरे सरकारच्या मंत्रिमंडळाचा विस्तार उद्या (ता. ३०) होणार आहे. ठाकरे सरकारच्या मंत्रिमंडळाच्या पहिल्या विस्तारात ३६ मंत्र्यांचा शपथविधी पार पडणार असल्याची चर्चा आहे. या शपथविधी सोहळ्याची जोरदार तयारी सध्या विधान भवनात सुरू आहे.

नव्या मंत्री आणि राज्यमंत्र्यांचा शपथविधी सोहळा ३० डिसेंबरला दुपारी १ वाजता विधानभवनाच्या प्रांगणात पार पडणार आहे. यापूर्वी हा शपथविधी सोहळा राजभवनावर होणार अशी चर्चा होती. मात्र शपथ घेणाऱ्या मंत्र्यांची संख्या आणि त्यांच्या समवेत या सोहळ्याला त्यांचे नातेवाईक, पक्षाचे कार्यकर्ते, आमदार तसेच राजकीय नेते असा मोठा लवाजमा उपस्थित राहण्याची शक्यता असल्याने सुरक्षेच्या दृष्टीने राजभवनावर होणारा शपथविधी सोहळा आता विधानभवनाच्या प्रांगणात होणार आहे. 

काँग्रेसच्या मंत्र्यांची नावे निश्चित न झाल्यामुळे २४ डिसेंबरला होणारा मंत्रिमंडळाचा विस्तार पुढे ढकलण्यात आला होता. मंत्रिमंडळाच्या विस्ताराबाबत राष्ट्रवादी काँग्रेसचे अध्यक्ष शरद पवार आणि मुख्यमंत्री उद्धव ठाकरे यांच्यात दोनच दिवसांपूर्वी सह्याद्री अतिथिगृहावर चर्चा झाली होती. शिवसेना आणि राष्ट्रवादीच्या मंत्र्यांची यादी तयार आहे. मात्र काँग्रेसची यादी तयार नसल्याची चर्चा होती. मात्र काँग्रेसच्या शपथ घेणाऱ्या मंत्र्यांची यादी तयार असल्याचे प्रदेशाध्यक्ष बाळासाहेब थोरात यांनी सांगितले आहे. 

राज्यातील महाराष्ट्र विकास आघाडी सरकारचा शपथविधी सोहळा २८ नोव्हेंबरला शिवतीर्थावर पार पडला होता. त्यानंतर मंत्रिमंडळ विस्ताराची चर्चा होती. पण काही ना काही अडचणींमुळे या विस्ताराला मुहूर्त मिळत नव्हता. महाराष्ट्र विकास आघाडीच्या येत्या ३० डिसेंबरला होणाऱ्या मंत्रिमंडळ विस्तारात शिवसेना आणि राष्ट्रवादीचे प्रत्येकी १० कॅबिनेट, ३ राज्यमंत्री आणि काँग्रेसचे १० मंत्री शपथ घेणार आहेत. यामध्ये तिन्ही पक्षांकडून आपापल्या मित्र पक्षांना आणि अपक्षांना या विस्तारात सामावून घेतले जाण्याची शक्यता आहे. शिवसेनेकडून प्रहार संघटनेने बच्चू कडू तर काँग्रेसकडून सपाचे अबू आझमी यांना संधी दिली जाण्याची शक्यता आहे.