कृषी पदविका, तंत्रनिकेतनच्या अंतिम वर्षाची परीक्षा रद्द

पुणे  : राज्यातील कृषी पदविका व तंत्रनिकेतन अभ्यासक्रमाची शेवटच्या वर्षाची परीक्षा रद्द करण्याचा निर्णय कृषी शिक्षण आणि संशोधन परिषदेने घेतला.

कृषिमंत्री दादा भुसे यांच्या अध्यक्षतेखाली झालेल्या बैठकीत हा निर्णय झाला. या वेळी कृषी राज्यमंत्री विश्‍वजित कदम, परिषदेचे महासंचालक विश्‍वजित माने, कृषी आयुक्त सुहास दिवसे उपस्थित होते. कृषी पदविकाधारकांची परीक्षा जुलैमध्ये होणार होती. परंतू ‘कोरोना’ची साथ असल्याने परीक्षा रद्द करण्याचा निर्णय परिषदेने घेतला. या विद्यार्थ्यांचे आता गेल्या वर्षभरातील अंतर्गत गुणांचे मूल्यमापन होईल. यंदाच्या वर्षातील अंतर्गत परीक्षेचे गुण आणि गेल्या दोन वर्षांतील मिळालेल्या गुणांच्या सरासरीवर आधारित गुण घेऊन विद्यार्थ्यांना उत्तीर्ण केले जाणार आहे. या निर्णयाचा फायदा २३० कृषी विद्यालयातील दहा हजार विद्यार्थ्यांना होणार आहे.

काष्टी (मालेगाव, जि. नाशिक) येथे कृषी व्यवस्थापन महाविद्यालय सुरू करण्याचा निर्णय बैठकीत घेण्यात आला. तसेच साकोलीमध्ये कृषी महाविद्यालय उभारण्याच्या शासनाच्या आधीच्या निर्णयाला मंजुरी देण्यात आली.  

कृषी पदवीधर युवा शक्ती संघटनेचे संस्थापक अध्यक्ष जयदीप ननावरे याबाबत म्हणाले, की ‘कोरोना’च्या पार्श्‍वभूमीवर परीक्षेबाबत संभ्रम होता. पालक चिंतेत होते. संघटनेकडे हा प्रश्‍न आल्यानंतर मंत्र्यांना या प्रश्‍नाची तीव्रता निवेदनाच्या माध्यमातून सांगितली गेली होती. राज्य शासनाचा हा निर्णय विद्यार्थ्यांच्या पालकांच्या हिताचा आहे.