पुण्यात १७ जानेवारीपासून पुष्प प्रदर्शनाचे आयोजन

पुणे  ः ॲग्री हार्टिकल्चर सोसायटी ऑफ वेस्टर्न इंडियाच्या वतीने १७ ते २६ जानेवारीदरम्यान एम्प्रेस गार्डन येथे पुष्प प्रदर्शनाचे आयोजन करण्यात आले असल्याची माहिती आयोजक सुरेश पिंगळे आणि अनुपमा बर्वे यांनी दिली. पुणे आणि पिंपरी चिंचवड महापालिकांच्या उद्यान विभागाच्या सहकार्याने आयोजित या प्रदर्शनामध्ये उद्यानांच्या प्रतिकृतींसह अनेक वर्षांचे जुने बोन्साय वृक्ष हे आकर्षण असणार आहे. 

११० वर्षे जुन्या असलेल्या एम्प्रेस गार्डनच्या व्यवस्थापनाची जबाबदारी सोसायटीकडे असून, गेली अनेक वर्षांपासून प्रदर्शनाचे आयोजन केले जात आहे. पुष्‍प प्रदर्शनात विविध शोभिवंत झाडांच्या कुंड्या, भाजीपाला, पुष्परचना, बोन्साय, लॅन्डस्केपिंगच्या विविध कलाकृती सादर केल्या जाणार आहेत. तसेच शालेय विद्यार्थ्यांसाठी चित्रकला, सुंदर हस्ताक्षर स्पर्धेचे आयोजन करण्यात आले आहे. हे प्रदर्शन सकाळी ९ ते सायंकाळी ७ वाजेपर्यंत सर्वांसाठी खुले असणार आहे.