पुणे जिल्हा परिषदेची कोरोनाबाबत उपाययोजनांसाठी पाच कोटींची तरतूद

पुणे  : जिल्ह्याच्या ग्रामीण भागातील कोरोनाग्रस्त रुग्णांच्या उपचारासाठी जिल्हा परिषदेच्या स्वनिधीतून पाच कोटी रुपयांची तरतूद केली आहे. आरोग्य विषयक विम्याचा लाभ घेण्यास पात्र नसलेल्या कोरोनाबाधित रुग्णांवर उपचार करण्यासाठी या निधीचा वापर केला जाणार असल्याची माहिती अध्यक्षा निर्मला पानसरे यांनी दिली.

पुणे जिल्हा परिषदेतर्फे ग्रामीण भागातील कोरोनाग्रस्त रुग्णांवर उपचारांसाठी निवडक खासगी रुग्णालयात व्यवस्था उभारली आहे. कोरोनाबाधित रुग्ण महात्मा फुले जन आरोग्य योजना, पंतप्रधान जन आरोग्य योजनेचा लाभ घेण्यासाठी पात्र आहेत. ज्या रुग्णांनी आरोग्य विमा उतरविला आहे. त्यांचा विमा रकमेतून खर्च करणे अपेक्षित आहे. या तीन योजना वगळता इतर रुग्णांच्या उपचारासाठी जिल्हा परिषदेने स्वनिधीतून पाच कोटी रुपयांची तरतूद करण्यात आली आहे. या तरतुदीला राज्य शासनाकडून विशेष बाब म्हणून मंजुरी दिली असल्याचे मुख्य कार्यकारी अधिकारी आयुष प्रसाद यांनी कळविले आहे.  

दिव्यांग व्यक्तींना सीएसआरमधून धान्य पुरवठा ‘कोरोना’च्या प्रादुर्भाव कालावधीमध्ये जिल्ह्यातील निराधार दिव्यांग, ज्येष्ठ नागरिक, गरोदर महिला अशा ५ हजार १६० लाभार्थ्यांना झोमॅटो कंपनीतर्फे सीएसआर निधीतून धान्य पुरवठा करण्यात येणार आहे. कंपनीतर्फे दौंड तालुक्यात धान्याचा पुरवठा करण्यात आला असून, उर्वरित तालुक्यांत धान्य वितरणाचे काम सुरू आहे.   उपकेंद्रांसाठी वैद्यकीय अधिकाऱ्यांची भरती ‘कोरोना’चा प्रादुर्भाव रोखण्यासाठी सर्वेक्षण, जनजागृती, रुग्णांची तपासणी या कामांसाठी उपकेंद्रांकरिता १८८ वैद्यकीय अधिकाऱ्यांची पदे भरण्यात आली आहेत. यामुळे फ्लू क्लिनिक, रुग्ण आढळलेल्या भागात सर्वेक्षण, संशयित रुग्णांना उपचारासाठी पाठवणे, घरात किंवा रुग्णालयात क्वारंटाईन करणे, खासगी वैद्यकीय व्यावसायिक व औषध विक्रेत्यांमार्फत संशयित रुग्ण शोधणे यासह कोरोनाचा संसर्ग रोखण्यास मदत होणार आहे.