संत एकनाथ महाराज यांच्या पादुकांचे प्रस्थान 

पैठण, जि. औरंगाबाद (प्रतिनिधी) : - आषाढी एकादशीसाठी संत श्री एकनाथ महाराज यांच्या पादुकांचे मंगळवारी (ता. ३०) एसटी बसने शासकीय निगराणीत पंढरपूरच्या दिशेने प्रस्थान झाले. 

पंढरपूर येथील आषाढी उत्सवात सहभागी होण्यासाठी मानाच्या संत एकनाथ महाराज यांच्या पादुकांसह रघुनाथ महाराज गोसावी पालखीवाले तसेच २० वारकऱ्यांनी प्रस्थान केले. परंपरेप्रमाणे आषाढी वारीची सुरुवात संत एकनाथ महाराज यांच्या राहत्या वाड्यातून पादुका पालखीने नाथ समाधी मंदिरात आणून ठेवत करण्यात आली होती. त्यानंतर मंगळवारी (ता. ३०) सकाळी पादुकांची पूजाअर्चा झाली.

राज्याचे रोजगार हमी योजना मंत्री संदिपान भुमरे यांच्या हस्ते पादुकांची आरती झाली. या वेळी तहसीलदार चंद्रकांत शेळके, कार्यकारी विश्वस्त दादा बारे, दिनेश पारीख, महेश खोचे, गणेश मडके, भाऊसाहेब जमादार, राजू लोहिया, विष्णू ढवळे, रेखाताई कुलकर्णी, रवींद्र साळजोशी, भगवान मिटकर आदी उपस्थित होते.