संत निवृत्तीनाथ महाराज यांच्या पादुकांचे पंढरपूरकडे प्रस्थान

नाशिक : ‘कोरोना’च्या पार्श्वभूमीवर दरवर्षी होणारी त्र्यंबकेश्वर ते पंढरपूर पायीवारी यावर्षी रद्द करण्यात आली. मात्र ही परंपरा सुरू ठेवण्यासाठी प्रशासनाने मोजक्या २० जणांना संत निवृत्तीनाथ महाराज यांच्या पादुकांसह पंढरपूर येथे श्री विठ्ठल दर्शनासाठी जाण्याची परवानगी दिली आहे. त्यानुसार मंगळवारी (ता.३०) आषाढी एकादशीसाठी श्री विठ्ठल दर्शनासाठी संत निवृत्तीनाथ महाराजांच्या पादुकांनी शिवशाही बसमधून पंढरपूरकडे प्रस्थान ठेवले.

मंगळवारी सकाळी प्रस्थानापूर्वी संत निवृत्तीनाथ महाराज मंदिरात टाळ मृदुंगाच्या गजर करीत संत निवृत्तीनाथ महाराज यांच्या चांदीच्या प्रतिमेसह पादुकांचे विधिवत पूजन करण्यात आले. त्यानंतर त्र्यंबकेश्वरमधील पवित्र कुशावर्त कुंडात पादुकांना स्नान घालण्यात आले तसेच विधिवत पूजा करण्यात आली. त्र्यंबकेश्वर मंदिराच्या प्रवेशद्वाराचे दर्शन घेऊन संत निवृत्तीनाथ महाराज यांच्या पादुका पंढरपूरच्या दिशेने मार्गस्थ झाल्या. ‘कोरोना’मुळे पायी वारीने न जाता यावर्षी पादुका शिवशाही बसमधून पंढरपूरला नेण्यात येणार आहेत.

या पादुकांसोबत पंढरपूरला जाण्यासाठी संत निवृत्तीनाथ समाधी मंदिर विश्वस्त मंडळाचे सदस्य, विणेकरी, ध्वजकरी, टाळकरी आणि व्यवस्थापकांसह २० जणांना परवानगी देण्यात आली आहे. यावेळी त्र्यंबकेश्वर-इगतपुरी मतदारसंघाचे आमदार हिरामण खोसकर, समाधी मंदिर विश्वस्त पुरुषोत्तम लोहगावकर, पप्पू शेलार, प्रशांत गायधनी उपस्थित होते.