शिरोळ, हातकणंगले तालुक्यातील ऊस वाहतूकदार बेमुदत संपावर

कोल्हापूर : शिरोळ, हातकणंगले तालुक्यांतील श्रीदत्त, गुरुदत्त, शरद, जवाहरव व पंचगंगा या साखर कारखान्यांकडील ऊस वाहतूक करणाऱ्या वाहनधारकांनी ऊस वाहतुकीच्या दरात वाढ करावी, यासह अन्य मागण्यांकरिता सोमवारपासून (ता. ९) बेमुदत ऊसतोडणी वाहतूक बंद आंदोलनास सुरुवात केली आहे. मंगळवारीही (ता. १०) हे आंदोलन सुरूच होते. यामुळे दोन्ही तालुक्यांतील ऊस वाहतूक ठप्प झाली आहे.

सध्याच्या ऊस वाहतूक दरात ४६ टक्‍के दरवाढ तसेच पाच टक्‍के कमिशन वाढ मिळावी, यासह आपल्या विविध मागण्यांकरिता शिरोळ व हातकंणगले तालुक्‍यातील पाच साखर कारखान्यांच्या वाहनधारकांनी सोमवारपासून बेमुदत ऊस वाहतूक बंद आंदोलनास सुरुवात केली आहे. यामुळे दोन दिवसांपासून ऊस कारखान्यांकडे येणे बंद झाल्याने या तालुक्यांमधील हंगाम ठप्प होण्याची शक्यता आहे.

दरम्यान, या पाच साखर कारखान्यांचे शेती अधिकारी व वाहनधारक संघटनांच्या प्रतिनिधींची दत्त साखर कारखाना कार्यस्थळावर तोडगा काढण्याकरिता बैठक झाली. रायगोंडा डावरे, श्रीकांत गावडे, धनाजी पाटील, शिवाजी संकपाळ, माधवराव पाटील, संभाजीराव जाधव यांनी वाहनधारकांच्या व्यथा मांडल्या. तथापि बाजारात साखरेचे दर कमी असल्याने ऊस उत्पादक शेतकऱ्यांना एकरकमी एफआरपीची रक्‍कम देण्यात सध्या अडचणी असल्याचे कारखानदारांनी सांगितले. पण तोडगा निघू शकला नाही.