Cotton Rate : खानदेशात कापूस दरात २०० रुपये सुधारणा

Cotton Market Rate News जळगाव ः खानदेशात मागील तीन दिवसांत कापूस दरात क्विंटलमागे २०० रुपयांची सुधारणा झाली आहे.

खेडा खरेदी किंवा थेट खरेदीत कापसाला ७७०० ते ८१०० रुपये प्रतिक्विंटलचा दर मिळत आहे.

मागील पाच ते सात दिवसांपूर्वी खेडा खरेदीत कापसाला ७५०० ते ८००० रुपये प्रतिक्विंटलचा दर होता. परंतु दरात सुधारणा झाली आहे.

खंडीचे दर (३५६ किलो रुई ६२ हजार रुपयांपर्यंत पोचले आहेत. सरकीचे दर मात्र स्थिर आहेत. खानदेशात अद्यापही कापसाची आवक कमी आहे.

धुळे, जळगाव व नंदुरबारात मिळून रोज सहा हजार गाठींच्या (एक गाठ १७० किलो रुई) कापसाची आवक होत आहे. अर्थात ३० ते ३५ हजार क्विंटल कापसाची आवक खानदेशात रोज होत आहे.

ही आवक मागील हंगामाच्या तुलनेत कमी आहे. यामुळे दर स्थिर आहेत. वायदा बाजाराबाबत सरकारने सकारात्मक कार्यवाही केल्याने दरात किंचित सुधारणा झाल्याचेही बाजारात चर्चिले जात आहे.

रोज सहा ते साडेसहा हजार गाठींची निर्मिती खानदेशात होत आहे. परंतु निर्यातीबाबत समाधानकारक चित्र नाही.

सूतगिरण्यांकडून काहीशी मागणी सध्या येत आहे. परंतु मोठे सौदे अद्याप होत नसल्याची स्थिती आहे. मागील हंगामात फेब्रुवारीच्या मध्यापर्यंत शेतकऱ्यांकडे फक्त २० टक्के कापूससाठा होता.

यंदा मात्र कारखानदारांकडे कमी व शेतकऱ्यांकडे अधिक कापूससाठा आहे. यामुळेदेखील दरांबाबत सकारात्मक चित्र नसल्याचे जाणकार सांगत आहेत.

शेतकऱ्यांकडील कापूससाठा संपल्यानंतर कापूस बाजाराची चाल गती घेते, दर वधारतात, अशी स्थिती राहिली आहे. यामुळे शेतकऱ्यांनी विक्री टाळल्याचा मुद्दाही उपस्थित होत आहे.