Tur Arrival : मलकापूर बाजार समितीत महिनाभरात तुरीची ९६ हजार क्विंटल आवक

Tur Market बुलडाणा ः विदर्भ-खानदेशच्या सीमेवर असलेल्या मलकापूर कृषी उत्पन्न बाजार समितीत तुरीची दररोज पाच हजार क्विंटलपेक्षा अधिक आवक सध्या होत आहे. सध्या आवक वाढत आहे.

जानेवारी महिन्यात तब्बल ९६ हजार ५८५ क्विंटल तुरीची आवक झाली होती, अशी माहिती बाजार समिती सूत्रांकडून मिळाली.

पश्‍चिम विदर्भातील एक प्रमुख बाजार समिती म्हणून मलकापूर प्रसिद्ध आहे. मका, तूर, कापूस व इतर धान्यांची येथे विक्री केली जाते. सध्या ही बाजार समिती तुरीच्या आवकेने फुलून गेली आहे.

या हंगामातील नवीन तुरीची एकीकडे काढणी सुरू आहे तर दुसरीकडे तयार झालेला हा शेतीमाल थेट बाजारात विक्रीला येत आहे.

या भागात कापूस, सोयाबीन, तूर ही प्रमुख पिके आहेत. सध्या दर वाढतील या अपेक्षेने शेतकऱ्यांनी कापसाची साठवणूक केली आहे. त्यामुळे दैनंदिन व्यवहार करण्यासाठी तुरीसारखे पीक विक्री करून शेतकरी गरज भागवत आहेत.

जानेवारीच्या पहिल्या आठवड्यापासून तुरीची काढणी सुरू झाली होती. त्यामुळे बाजारात या काळात दररोज तुरीच्या आवकेत वाढ होत गेली.

१ ते ३१ जानेवारी या काळात तब्बल ९६ हजार ५८५ क्विंटल तुरीची आवक झाली होती. बाजारात दररोज येणाऱ्या मालाचा लिलाव करून मोजमाप केले जाते.

मध्यंतरी दरावरून शेतकरी संतप्त झाले होते. त्यानंतर नियमितपणे हा बाजार भरत आहे. तुरीच्या आवकेमुळे बाजार समितीचे संपूर्ण प्रांगण फुलून जाते.

आमच्या बाजार समितीत रोजची जितकी आवक त्याचा लिलाव त्याच दिवशी होऊन मोजमाप केले जाते. शेतकऱ्यांना २४ तासांत चुकारे दिले जातात. खुली हर्राशी (लिलाव) पद्धत असल्याने दर चांगले मिळतात.

खरेदीदार अधिक आहेत. त्यामुळेच स्थानिकसह जळगावमधील पाचोरा, मुक्ताईनगर, मध्य प्रदेशातील बऱ्हाणपूर अशा भागांतूनही शेतीमालाची आवक होते.

- अजय जाधव, सचिव, कृषी उत्पन्न बाजार समिती, मलकापूर, जि. बुलडाणा

गेल्या आठवड्यातील आवक

तारीख सरासरी दर (रुपयांत) आवक (क्विंटल)

२५ जानेवारी ६८११ ५८४०

२७ जानेवारी ७११० ४२०५

२८ जानेवारी ६७४० ४७२०

३० जानेवारी ७२०० ५८६०

३१ जानेवारी ६८५० ६५६०

१ फेब्रुवारी ६९०० ७१८५