Tur Chana Market: गुजरात हमीभावाने तूर, हरभरा खरेदी करणार

पुणेः गुजरात सरकारने (Gujrat Govt.) राज्यातील शेतकऱ्यांची तूर (Tur), हरभरा (Chana) आणि मोहरी (Mustered) खरेदीचे वेळापत्रक जाहीर केले.

१ फेब्रुवारीला नोंदणी सुरु होणार असून १० मार्चपासून खेरदी सुरु होणार आहे. गुजरात सरकार आता हमीभावाने खरेदीत उतरले आहेत.

त्यामुळे गुजरातमधील शेतकऱ्यांना काहीसा दिलासा मिळाला.

गुजरात राज्याचे कृषिमंत्री राघवजी पटेल यांनी याबाबत माहिती दिली. शेतकऱ्यांकडून तूर, हरभरा आणि मोहरी खरेदीचा निर्णय राज्य सरकारच्या उच्च स्तरीय समितीच्या बैठकीत घेण्यात आल्याचं पटेल यांनी सांगितलं.

आपला माल विक्रीसाठी शेतकऱ्यांना नोंदणी करावी लागणार आहे. नोंदणीसाठी एक महिन्याची मुदत असून १ फेब्रुवारीपासून नोंदणीला प्रारंभ होणार आहे.

गुजरात सरकारने शेतकऱ्यांना दिलासा देण्यासाठी माल हाती येण्याच्या काळातच प्रक्रिया सुरु करण्यात येणार आहे.

प्रत्यक्ष तूर, हरभरा आणि मोहरीची खरेदी खरेदी १० मार्चपासून सुरु होईल. खरेदीची प्रक्रिया ९० दिवस चालेल. रोज ६२५ क्विंटलच्या दरम्यान खरेदी केली जाणार आहे.

शेतकऱ्यांकडून खरेदीसाठी केंद्रांची संख्याही वाढविण्यात येणार आहे. गुजरातमध्ये १३५ केंद्रांवर तुरीची खरेदी जाणार आहे.

तर हरभऱ्याची खरेदी १८७ केंद्रांवर केली जाईल. मोहरीसाठी १०३ केंद्र सुरु करण्यात येतील. केंद्राने यंदा तुरीसाठी ६ हजार ६०० रुपये हमीभाव जाहीर केला.

तर हरभऱ्याला ५ हजार ३३५ रुपये आणि मोहरीसाठी ५ हजार ४५० रुपये हमीभाव जाहीर केला.

खुल्या बाजारात तूर,  मोहीरीचे दर अधिक
खुल्या बाजारात तूर आणि मोहरीला सध्या हमीभावापेक्षा जास्त भाव मिळत आहे. तर हरभऱ्याचे दर मागील वर्षभरापासून हमीभावापेक्षा कमीच आहेत.

सध्या गुजरातमधील बाजारात तुरीला ५ हजार ५०० ते ७ हजार ४०० रुपयांच्या दरम्यान दर मिळत आहे.

राजकोट बाजारात तुरीची सरासरी १ हजार २०० क्विंटल आवक झाली होती. तसेच मोहीरीचेही दर ५ हजार ६०० रुपये प्रतिक्विंटल होते.

तर हरभऱ्याला केवळ ४ हजार ६३० ते ४ हजार ७२५ रुपये दर मिळत आहे.

उत्पादन वाढण्याचा अंदाज
गुजरात तूर, हरभरा आणि मोहरी उत्पादनात महत्वाचे राज्य आहे. यंदा गुजरातमध्ये या शेतीमालांचे उत्पादन वाढेल, असा अंदाज राज्य सरकारने व्यक्त केला.

गुजरातने यंदा तुरीचे उत्पादन २ लाख ९१ हजार टनांवर पोचेल, असा अंदाज जाहीर केला. तर हरभरा उत्पादन १५ लाख ५० हजार टनांवर स्थिरावेल.

तर मोहरी उत्पादन ६ लाख ३९ लाख टनांचा टप्पा गाठेल, असा अंदाज गुजरात सरकारने व्यक्त केला.