Cotton Market : शेतकऱ्यांकडून निम्म्या कापसाची विक्री; दर वाढतील का?

Cotton Price : देशातील एकूण कापूस उत्पादनापैकी (Cotton Production) निम्मा कापूस बाजारात आला. शेतकऱ्यांनी ऑक्टोबर ते फेब्रुवारी या पाच महिन्यांमध्ये १६० लाख गाठी कापूस विकला.

तर होळीनंतर शेतकरी कापूस विक्री वाढवतील, असा अंदाज व्यापारी व्यक्त करत आहेत. आज देशातील बाजारात कापूस आवक (Cotton Arrival) घटली होती. मात्र दरातही नरमाई दिसून आली.

देशातील कापूस उत्पादन यंदा ३२१ लाख गाठींवर स्थिरावण्याचा अंदाज काॅटन असोसिएशन ऑफ इंडियाने व्यक्त केला. पण भारताची कापूस निर्यात यंदा घटण्याचा अंदाज आहे. मागील हंगामात भारताने ४३ लाख गाठी कापसाची निर्यात केली होती.

पण यंदा निर्यात ३० लाख गाठींवर स्थिरावण्याचा अंदाज आहे. तर भारतातून फेब्रुवारीपर्यंत केवळ ८ लाख गाठी कापसाची निर्यात झाल्याचे कापूस निर्यातदारांनी सांगितले.

काॅटन असोसिएशन ऑफ इंडियाने यंदा देशातील कापूस उत्पादन घटण्याचा अंदाज व्यक्त केला. पण तरी काही व्यापारी संस्था आणि उद्योग यंदा उत्पादन गेल्यावर्षीपेक्षा जास्त असल्याचं सांगत आहेत.

यंदा गेल्यावर्षीपेक्षा जास्त उत्पादन झाले तरी निर्यातमात्र निचांकी पातळीवर स्थिरावेल. यंदा ऑक्टोबर ते फेब्रुवारी या पाच महिन्यांच्या काळात केवळ ८ लाख गाठी कापूस निर्यात झाला. यावरून यंदा निर्यातीची गती कमी आहे, याची कल्पना येते.

जागतिक पातळीवर सध्या महागाई वाढली आहे. तर रशिया आणि युक्रेन युध्दामुळे युरोपातून मागणी कमी झाली. त्यामुळे जागतिक कापूस मागणी कमी झाली. देशातील बाजारात आत्तापर्यंत १६० लाख गाठी कापसाची आवक झाली. म्हणजेच निम्मा कापूस बाजारात आला. तर गुजरातमध्ये ४५ लाख गाठी कापसाची आवक झाली.

देशातील बाजारात आज कापूस आवक काहीशी घटली होती. तर दरही नरमले होते. आज कापसाला सरासरी ७ हजार ८०० ते ८ हजार ३०० रुपये भाव मिळाला. आंतरराष्ट्रीय बाजारातही कापूस दरात चढ उतार सुरु आहेत. पण कापूस दर जास्त नरमणार नाहीत.

कापूस सरासरी ८ हजार ५०० रुपयांच्या पातळीवर राहण्यास अनुकूल स्थिती आहे. त्यामुळे शेतकऱ्यांनी पॅनिक सेलिंग टाळावे, असे आवाहन कापूस बाजारातील अभ्यासकांनी केले.

कापूस आवक वाढण्याची आशा

देशातील सूत मागणी सध्या धीमी असल्यानं सुतगिरण्या ८० टक्के क्षमतेने सुरु आहेत. मागील महिन्यात बांगलादेशातून काही ऑर्डर्स मिळाल्या. देशातील बाजारात होळीनंतर कापूस आवक वाढण्याचा अंदाज आहे. पण कापूस खंडीचे भाव ५८ हजार रुपयांपेक्षा कमी होण्याची शक्यता नाही, असेही व्यापाऱ्यांनी सांगितले.