Moong Market : आवक वाढल्याने मुगाच्या दरात नरमाई

Moong Bazar Bhav : देशातील बाजारात सध्या उन्हाळी मुगाची आवक वाढत आहे. त्यामुळे मुगाच्या दरात नरमाई दिसून आली. मुगाच्या भावात मागील काही दिवसांपासून क्विंटलमागे ४०० रुपयांची नरमाई दिसून आली. सध्या मुगाला ७ हजार ५०० ते ८ हजार ५०० रुपयांच्या दरम्यान भाव मिळत आहे.

मध्य प्रदेशाती बाजारात उन्हाळी हंगामातील मुगाची आवक वाढत आहेत. आवकेचा दबाव बाजारावर येत आहे. मुगाची आवक वाढल्याने दर कमी झाले. त्यातच सरकारने अजूनही हमीभावाने खरेदी सुरु केली नाही. मार्कफेडही बाजारात मुगाची कमी दरात विक्री करत आहे.

मध्य प्रदेशात हमीभावाने मूग खरेदीसाठी ३१ मेपर्यंत नोंदणी केली जाणार आहे. त्यानंतर खेरदी सुरु होईल. त्यामुळे सध्या भाव दबावात आहेत. पण सध्या खरिपाच्या तयारीसाठी शेतकरी मुगाची कमी भावात विक्री करत आहेत. सरकारची खेरदी सुरु होईपर्यंत जास्तीत जास्त मूग खुल्या बाजारात विक्री होण्याची शक्यता आहे.

यंदा देशात उन्हाळी मुगाच्या उत्पादनात चांगली वाढ झाल्याचे शेतकरी सांगत आहेत. पण सरकारची खरेदी उशीरा सुरु होत असल्याने सरकारला जास्त खरेदी करता येणार नाही, असे बाजारातील जाणकार सांगत आहेत.

सध्या बाजारात आवकेचा दबाव असल्याने दर नरमले आहेत. उत्तरेतील राज्यांमध्ये उन्हाळी मुगाची आवक वाढल्याने दरावर दबाव येत आहे. देशातील महत्वाच्या बाजारांमध्ये मुगाच्या दरात नरमाई दिसून येत आहे. देशात मुगाला सध्या सरासरी ८ हजार ते ८ हजार ८०० रुपयांचा भाव मिळत आहे.

जळगाव बाजारात मुगाचे भाव ७ हजार ५०० ते ८ हजार ३०० रुपयांच्या दरम्यान आहेत. नव्या मुगाची आवक होत असल्याने जुन्या मुगाचे भाव सध्या दबावात आहेत.

मे महिन्याच्या सुरुवातीला जुन्या मुगाचे भाव प्रतिक्विंटल सरासरी ८ हजार ते ९ हजार रुपयांच्या दरम्यान होते. ते आता ८ हजार रुपयांच्या दरम्यान आहे. तर हंगामाच्या सुरुवातील नव्या मुगाला ८ हजार ८०० रुपयांचा भाव मिळत होता.

त्यात आता नरमाई दिसून येत आहे. अकोला बाजारात चालू महिन्याच्या पहिल्या आठवड्यात मुगाचा सरासरी भाव ७ हजार २०० ते ९ हजार ७५० रुपये होता. हे दर आता जवळपास ४०० रुपयांनी कमी झाले.

देशातील बाजारात आवकेचा दबाव असल्याने नरमाई दिसून येत आहे. पण पुढील काही दिवसांमध्ये आवक कमी होईल. त्यामुळे दरात काहीशी तेजी येऊ शकते. पण खरिपातील माल पुढील काही महिन्यांमध्ये बाजारात येईल. त्यामुळे दरात मोठ्या तेजीची शक्यता दिसत नाही, असा अंदाज बाजारातील अभ्यासकांनी व्यक्त केला.