उसाच्या एफआरपीत प्रतिटन १५० रुपये वाढ करावी

कोल्हापूर : येणाऱ्या साखर हंगामात (Sugar Season) तुटणाऱ्या उसाच्या एफआरपीत (Sugarcane FRP) प्रतिटन १५० रुपये वाढ करण्याची शिफारस कृषिमूल्य आयोगाने केंद्राकडे केली आहे. या शिफारशीचा प्रस्ताव कृषी मंत्रालयाने (Agriculture Department) केंद्रीय मंत्रिमंडळासमोर ठेवला आहे. मात्र, एफआरपी ठरवताना साखर उताऱ्याचा (Sugar Recovery) बेस रेट १० ऐवजी १०:२५ टक्के केल्याने शेतकरी संघटनांनी मात्र कृषिमूल्य आयोगाच्या शिफारशीवर टीकेची झोड उठवली आहे.

केंद्राने गेल्यावर्षी एफआरपीची रक्कम १० उताऱ्याला २८५० वरून २९०० रुपये केली होती. यंदा १५० रुपये वाढ करीत ३०५० रुपये केली आहे. यंदा एफआरपीचा दर ठरवण्यासाठी उताऱ्याचा बेस १० ऐवजी १०.२५ टक्के ठेवण्यात आला आहे. हे समीकरण गृहीत धरले तर वाढ १५० ऐवजी फक्त ७५ रुपयांची मिळते ही सरळ सरळ फसवणूक असल्याचा आरोप शेतकरी संघटनांनी केला आहे.

गेल्यावर्षीच्या हंगामात हा बेस १० टक्के धरण्यात आला होता. यावर्षीच्या तोडणी-ओढणी खर्चातही वाढ करून तो प्रतिटन ७२५ रुपये करण्यात आला आहे. एकूण एफआरपीतून तोडणी-ओढणीचा खर्च वजा होऊन १०.२५ साखर उतारा असेल तर ३०५० रुपये एफआरपी होईल. यातून तोडणी खर्च वजा झाल्यास २३२५ रुपये उत्पादकांना मिळणार आहेत. जसा साखर उतारा जास्त येईल तशी वाढीव रक्कम उत्पादकांना मिळेल.

अंमलबजावणी पुढील हंगामातील उताऱ्यावरच
पूर्वी गेल्यावर्षीच्या उताऱ्यावर पुढील वर्षीच्या हंगामाचा दर दिला जात होता. त्यात यावर्षीच्या हंगामापासून महाराष्ट्र शासनाने बदल करून ज्यावर्षीचा उतारा त्याचवर्षीची एफआरपी देण्याचा निर्णय घेण्यात आला आहे. त्यामुळे नव्या एफआरपी वाढीची अंमलबजावणी पुढील हंगामातील उताऱ्यावरच होणार आहे.