Jalgaon News : शासकीय हरभरा खरेदीस अद्यापही सुरुवात झालेली नाही. परंतु यासंबंधी शेतकऱ्यांची ऑनलाइन नाव नोंदणी सुरू झाली आहे. खानदेशात शासकीय हरभरा खरेदीसंबधी (Chana Procurement) ऑनलाइन नोंदणी सुरू झाली आहे.
बाजारात हरभऱ्याचे दर हमीभावापेक्षा (Chana MSP) कमी आहेत. त्यामुळे या केंद्रात हरभरा विक्रीसाठी चांगला प्रतिसाद मिळत आहे.
बाजारात सध्या हरभऱ्याचे दर कमाल ४८०० रुपये प्रतिक्विंटल आहेत. जळगाव जिल्ह्यात १७ खरेदी केंद्रे सुरू केली जातील. तसेच धुळ्यात पाच, नंदुरबारात पाच खरेदी केंद्रे सुरू राहतील.
जळगावात एका केंद्रात रोज किमान एक हजार अर्ज हरभरा विक्रीच्या नोंदणीसाठी शेतकऱ्यांकडून येत आहेत.
यंदा हरभऱ्याचे उत्पादन बऱ्यापैकी आहे. मळणी मागील महिन्यातच सुरू झाली आहे. कमाल शेतकऱ्यांचा हरभरा घरात आहे. तर काही शेतकऱ्यांनी त्याची विक्री केली आहे. यामुळे खरेदी मर्यादा व लक्ष्यांकदेखील वाढविण्याची मागणी केली जात आहे.
एकरी ७ ते ८ क्विंटल उत्पादन आले आहे. यामुळे खरेदीसंबंधी हेक्टरी २० क्विंटलची नवी मर्यादा जाहीर करण्याची मागणी केली जात आहे.
देशी, देशी सुधारित व देशी संकरित हरभऱ्याची पेरणी खानदेशात अधिक केली जाते. यामुळे शासनालाही खरेदीसंबंधी नवी मर्यादा व नवे धोरण आणावे लागेल, अशी स्थिती आहे.
जळगावात ५ हजार शेतकऱ्यांकडून नोंदणी
हरभरा पीकपेरऱ्याचा सातबारा उतारा, आधार कार्ड, बँक पासबुकची झेरॉक्स आदी कागदपत्रे शेतकऱ्यांना सादर करावी लागत आहेत. त्यासाठी शेतकरी संबंधित खरेदी केंद्रात पोहोचत आहेत.
या नोंदणीसाठी जिल्ह्यात रावेर, अमळनेर, चोपडा, जळगाव, यावल, जामनेर, मुक्ताईनगर या सर्वच भागांत प्रतिसाद मिळत आहे.
दोन दिवसांत जळगाव जिल्ह्यात पाच हजारांवर शेतकऱ्यांची ऑनलाइन नोंदणी, ऑनलाइन अर्ज सादर झाले आहेत. धुळे व नंदुरबारातही अडीच हजारांवर अर्ज आले आले आहेत.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
